Ahmednagar News: जेवणाचे बिल मागितल्याने हॉटेल चालकाला मारहाण; टोळक्याकडून हॉटेलचीही तोडफोड

अहमदनगर : जेवणाचे बिल मागितल्याच्या वादातून टोळक्याने हॉटेलची तोडफोड केल्याची घटना अहमदनगर जिल्ह्यातील कर्जतमध्ये घडली असून हॉटेल चालक आणि कामगारांनाही मारहाण करण्यात आली आहे. या घटनेच्या निषेधार्थ सकल मराठा समाजाने बंदची हाक दिल्याने कर्जत शहरातील व्यावसायिकांनी कडकडीत बंद पाळला. (Ahmednagar News)

अहमदनगर जिल्ह्यातील कर्जत शहरात शनिवारी रात्री एका हॉटेलमध्ये जेवायला आलेले ग्राहक आणि हॉटेल चालकामध्ये बिलावरून वाद झाले. यावेळी संबधित टोळक्याने हॉटेलचे मालक पंडित निंबाळकर यांच्यासह कर्मचाऱ्यांना बेदम मारहाण करत हॉटेलची तोडफोड केली. (Latest Marathi News)

तसेच गल्ल्यातील रोकड आणि हॉटेल चालकाच्या गळ्यातील सोन्याची चेन या टोळक्याने चोरून नेली आहे. या घटनेचे तीव्र पडसाद आज कर्जत शहरांमध्ये उमटले. या घटनेचा निषेध म्हणून सकल मराठा समाजाच्या वतीने आज कर्जत शहर बंदची हाक देण्यात आली होती. त्यामुळे कर्जत शहरामध्ये सकाळपासून सर्व व्यवहार पूर्णपणे कडकडीत बंद ठेवण्यात आले आहेत.

सर्व आरोपींना तात्काळ अटक करावी अन्यथा बेमुदत कर्जत शहर बंद ठेवू असा इशारा सकल मराठा समाजाच्या वतीने देण्यात आला आहे. कर्जत शहरातून सकाळी युवकांनी रॅली काढली आणि त्यानंतर पोलीस स्टेशनमध्ये जाऊन पोलीस निरीक्षक चंद्रशेखर यादव यांच्याकडे शनिवारी घडलेल्या मारहाणीच्या घटनेतील आरोपींना तात्काळ अटक करावी अशी मागणी केली आहे.