चेकअपचे निमित्त करून कंपाउंडरने केला महिलेचा विनयभंग; आरोपी फरार

लातूर जिल्ह्यातील (Latur District) उदगीर येथील उपजिल्हा रुग्णालयात प्रसूतीसाठी दाखल होऊन प्रसूती झालेल्या एका 21 वर्षीय महिलेचा रुग्णालयातील कंपाउंडरने चेकअपचे निमित्त करून ओपीडीमध्ये नेऊन विनयभंग केल्याची घटना घडली आहे. पीडित महिलेच्या फिर्यादीवरून शहर पोलिस ठाण्यात कंपाउंडर वर विनयभंगाचा गुन्हा दाखल करण्यात आला आहे.

सदरील महिलेची प्रसूती झाली होती. दरम्यान या रुग्णालयातील कंपाउंडर आरोपी सचिन राजमाने याने प्रसूत झालेल्या महिलेला चेकअप करण्याच्या निमित्ताने रुग्णालयातील ओपीडी रूममध्ये नेऊन या महिलेचा विनयभंग केला दुध येते का नाही म्हणून वाईट हेतूने स्पर्श केला अशा आशयाची फिर्याद सायंकाळी पीडित महिलेने दिल्यावरून शहर पोलीस ठाण्यात रात्री अडीच वाजण्याच्या दरम्यान आरोपी वर विनयभंगाचा गुन्हा दाखल करण्यात आला आहे.

या प्रकरणाचे गांभीर्य ओळखून पोलीस निरीक्षक गोरख दिवे यांनी घटनास्थळी भेट देऊन माहिती घेतली. रात्री अडीच वाजता गुन्हा दाखल करून पुढील तपास महिला पोलीस उपनिरीक्षक जाधव यांच्याकडे देण्यात आला आहे. सध्या या प्रकरणातील आरोपी फरार आहे.

Edited By: Pravin Dhamale