स्मार्ट सिटीमधील नागरिकांना वापरावे लागतंय शौचालयातील टाकीचे पाणी

सिद्धेश म्हात्रे

नवी मुंबईतील एमआयडीसी भागात असणाऱ्या झोपडपट्टी मध्ये मागील 2 ते 3 महिन्यांपासून पाणीपुरवठा बंद आहे. त्यामुळे झोपडपट्टी मधील नागरिक चक्क मनपाच्या शौचालयाला असलेल्या नळातून पाणी भरत आहेत. नवी मुंबई (Navi Mumbai) 21 व्या शतकातील स्मार्ट सिटी, महाराष्ट्रातील सर्वात स्वच्छ शहर. नवी मुंबई शहराला पाणीपुरवठा करण्यासाठी मनपाचे स्वतःच्या मालकीचे मोरबे धरणही आहे. मात्र आपल्याला ऐकून आश्चर्य वाटेल की याच स्मार्ट सिटी मधील तुर्भे झोपडपट्टी मध्ये चक्क शौचालयातील पाणी वापरण्याची वेळ येथील काही नागरिकांवर आली आहे.

शहराच्या एक बाजूस संपूर्ण शहर वसलंय तर दुसऱ्या बाजूला एमआयडीसी याच तुर्भे एमआयडीसी मधील हे भयंकर वास्तव समोर आलं आहे. 6 महिन्यांपासून या झोपडपट्टीला पाणी पुरवठा होत नसल्याने चक्क शौचालयावर लावण्यात आलेल्या पाण्याच्या टाकीतून पाणी भराव लागत आहे. हे पाणी देखील सहज मिळत नसून यासाठी देखील नागरिकांना रांगा लावाव्या लागत आहेत. 21व्या शतकातील स्मार्ट शहरात नागरिकांना शौचालयातील पाण्याच्या टाकीतील पाणी प्यावे लागत असेल तर स्वच्छतेत मिळणारी जागतिक नामांकन काय कामाची असा प्रश्न उपस्थित होत आहे.

Edited By: Pravin Dhamale