Farmer : पोलिसांची तटबंदी भेदून तुपकर समर्थकांचे समुद्रात आंदोलन; समुद्रात बुडवले सातबारा व सोयाबीन

बुलढाणा : क्रांतिकारी शेतकरी संघटनेचे आंदोलन उधळून टाकण्यासाठी सरकार आणि पोलिसांनी प्रयत्न केले. रविकांत तुपकर यांच्यासह बहुसंख्य शेतकऱ्यांना अटक केली. तरी देखील काही शेतकऱ्यांनी मुंबई पोलिसांची तटबंदी भेदत अरबी समुद्रात कर्जाचा बोजा असलेला सातबारा तसेच सोयाबीन व कापूस बुडवत आंदोलन करून स्वतःला कर्जमुक्त घोषित केले. 

शेतकऱ्यांच्या मालाला योग्य हमीभाव मिळत नसल्याने शेतकरी नेते रविकांत तुपकर यांचे आंदोलन सुरू होत. दरम्यान आज रविकांत तुपकर हे शेतकऱ्यांसह अरबी समुद्रात आंदोलन करणार होते. या आंदोलनापूर्वीच पोलिसांनी शेतकऱ्यांसह रविकांत तुपकर यांना ताब्यात घेतले होते. मुंबईकडे कूच करण्याआधीच खालापूर येथे ताब्यात घेण्यात आले होते. यानंतर काही शेतकऱ्यांनी पोलिसांचा फौजफाटा भेदून आंदोलन केले आहे. 

कापूस, सोयाबीन, सातबारा बुडविला समुद्रात 
क्रांतिकारी शेतकरी संघटनेचे बीड जिल्हाध्यक्ष कुलदीप करपे व त्यांचे सहकारी बुधवारी (१९ मार्च) दुपारी मुंबई पोलिसांची तटबंदी भेदून बोटीद्वारे अरबी समुद्रात दाखल झाले. जवा पिकलं तवा लुटलं, आता देणं घेणं फिटलं, म्हणत अरबी समुद्रात कर्जाचा बोजा असलेल्या सातबारा तसेच कवडी मोल भाव मिळाल्याने तीन वर्षापासून घरात पडून असलेला कापूस व सोयाबीन अरबी समुद्रात बुडवले. यावेळी आम्ही कर्जमुक्त होणारच अशा घोषणा दिल्या. 

अटकेचा केला निषेध 

मुंबईच्या प्रत्येक चौकात प्रचंड पोलीस बंदोबस्त असतानाही तुपकरांचे क्रांतिकारी शिलेदार अखेर अरबी समुद्रात बोटीद्वारे पोहचले व त्यांनी सोयाबीन व सातबारे फेकून प्रतिकात्मक आंदोलन यशस्वी केल्याने पोलिसांची तारांबळ उडाली. दरम्यान रविकांत तुपकर व आंदोलक शेतकऱ्यांना खालापूर पोलिसांनी बळाचा वापर करून केलेल्या बेकायदेशीर अटकेचा जाहीर निषेध नोंदवला.