Buldhana : आधी अत्याचार अन् नंतर हत्या ; नदीत आढळला १७ वर्षीय गतिमंद तरुणीचा विवस्त्र मृतदेह

बुलढाणा जिल्ह्यामध्ये मोताळा तालुक्यातील बोराखेडी शिवारामध्ये एका १७ वर्षीय अल्पवयीन गतिमंद मुलीचा मृतदेह विवस्त्र अवस्थेत नदीच्या पाण्यावर तरंगताना आढळला . प्राथमिक अंदाजानुसार तरुणीवर लैंगिक अत्याचार करून तिची हत्या केली असल्याचं पोलिसांचं म्हणणं आहे. या घटनेनंतर परिसरात खळबळ उडाली असून पोलीस सखोल तपास करत आहेत.

मिळालेल्या माहितीनुसार, बुलढाण्यातील मोताळा येथील प्रशासकीय इमारतीच्या पाठीमागच्या गिट्टी खदान जवळ असलेल्या परिसरात सदर घटना घडली आहे. मोताळा तालुक्यातील बोराखेडी शिवारामध्ये एका १७ वर्षीय अल्पवयीन गतिमंद मुलीचा मृतदेह विवस्त्र अवस्थेत नदीच्या पाण्यावर तरंगताना नागरिकांना आढळला. याविषयी ग्रामस्थांनी तातडीने पोलिसांना कळवले.

पोलिसांनी घटनास्थळी दाखल होत पंचनामा केला असून मुलीचा मृतदेह ताब्यात घेऊन शवविच्छेदनासाठी पाठवण्यात आला आहे. पोलिसांच्या प्राथमिक अंदाजानुसार मुलीवर लैंगिक अत्याचार करण्यात आले. त्यानंतर तिची हत्या करून तिला या नदीत टाकल्याचे म्हटले.

याप्रकरणी आता बोराखेडी पोलिसांनी तपास सुरू केलं असून पोस्टमार्टम तसेच तांत्रिक बाबींच्या आधारे तपास केलाय जात आहे. गतिमंद मुलगी दोन दिवसापासून घरातून बेपत्ता होती. मात्र सर्वत्र शोध घेत असताना तिचा मृतदेही आढळून आल्याने खळबळ उडाली आहे.