महाराष्ट्रातील सध्याच्या राजकीय घडामोडींबाबत भाजपची भूमिका काय ? भाजप खासदाराने स्पष्टच सांगितलं

सोलापूर : एकनाथ शिंदे गट आणि महाविकास आघाडी सरकारचा (mva government) सत्तासंघर्ष दिवसेंदिवस आक्रमक होत आहे. शिंदे गट आणि मविआच्या वकिलांकडून सुप्रीम कोर्टात एकमेकांविरोधात याचिका दाखल करण्यात आल्या आहेत. बंडखोर एकनाथ शिंदे गट (Eknath shinde) आणि शिवसेना यांच्यात राजकीय कुरघोड्या सुरुच आहेत. मात्र, भाजपच्या गोटातून यावर ठामपणे प्रतिक्रिय येत नाही. राज्यात महाविकास आघाडी सरकारमध्ये उभी फूट पडली आहे. परंतु, आमदारांच्या बंडखोरीच्या भूमिकेत आमचा कसलाही संबंध नसल्याचा दावा भाजपकडून करण्यात येत आहे. याचा पार्श्वभूमीवर राज्यसभेचे खासदार धनंजय महाडीक (Dhananjay Mahadik) यांनी प्रतिक्रिया दिली आहे. राज्यातील राजकारणाच्या सध्याच्या घटनाक्रमावर भाजपची वेट अॅंड वॉचची भूमिका घेतली आहे, असं महाडीक यांनी स्पष्ट केलं आहे.

मिळालेल्या माहितीनुसार, महाविकास आघाडी सरकारमधील शिवसेनेत उभी फूट पडली आहे. त्यामुळं हे सरकार कोलमडेल अशी चिन्ह दिसत असताना राज्यातील विरोधी पक्ष भाजप मात्र याकडे 'वेट अँड वॉच'च्या भूमिकेत असल्याचं चित्र आहे. सध्या राज्यामध्ये अभूतपूर्व परिस्थिती निर्माण झाली आहे. शिवसेनेच्या काही नेत्यांनी घेतलेल्या भूमिकेकडे भाजप लक्ष ठेऊन आहे. भाजपचे वरिष्ठ नेते देवेंद्र फडणवीस आणि चंद्रकांत पाटील यांनी अद्याप राजकीय परिस्थितीवर भूमिका जाहीर केलेली नाहीये, असंहा महाडीक म्हणाले आहेत.

Edited By - Naresh Shende