खुर्ची गेली की उद्धव ठाकरे यांची अवस्था वाईट होईल, निलेश राणेंचा घणाघात

सिंधुदुर्ग : शिवसेनेचे नेते आणि मंत्री एकनाथ शिंदे (Eknath Shinde) यांनी त्यांच्या जवळपास ५० समर्थक आमदारांसोबत बंड केल्याने शिवसेनेची कोंडी झाली आहे. बंडखोर आमदारांनी सत्तापरिवर्तनाचा पवित्रा हातात घेतल्याने महाविकास आघाडी सरकारला (mva government) मोठा धक्का बसला आहे. शिवसेना आणि शिंदे गट यांच्यात जोरदार सत्तासंघर्ष सुरु आहे. त्यामुळे राजकीय वर्तुळातून भाजपचे नेते शिवसेनेवर टीका करत आहेत. भाजप नेते आणि खासदार (Nilesh Rane) निलेश राणे यांनी मुख्यमंत्री उद्धव ठाकरे (uddhav Thackeray) यांच्यावर तोफ डागली आहे. खुर्ची गेली की उद्धव ठाकरेंची अवस्था वाईट होईल, असा घणाघात राणे यांनी ठाकरे यांच्यावर केला आहे.

यावेळी निलेश राणे माध्यमांशी बोलताना म्हणाले की, खुर्ची गेली की उद्धव ठाकरेंची अवस्था वाईट होईल. उद्धव ठाकरे आणि आदित्य ठाकरे हे नशिबाने झालेले नेते आहेत. त्यांचं स्वतःचं कर्तृत्व काहीच नाही. जे उद्धव ठाकरे सांगताहेत बाळासाहेब ठाकरे यांचा फोटो वापरू नका, मी तर त्यांना असं आवाहन करतो की, तुम्ही ठाकरे न वापरता रस्त्यावर उतरून बघा. मग तुमची अवस्था तुम्हाला समजेल. तुमचा फोटो तरी तुमचा मुलगा वापरतो का? तुमचा मुलगा आपल्या आजोबांचा फोटो वापरतो आणि तुमचा फोटो वापरण्याएवढं आहे तरी काय? त्यामुळे तुम्ही आता तरी जमिनीवर या, अशी खरमरीत टीका माजी खासदार निलेश राणे यांनी उद्धव ठाकरे यांच्यावर केली आहे.

Edited By - Naresh Shende