आताची मोठी बातमी! देवेंद्र फडणवीसांच्या बंगल्याबाहेरील पोलीस सुरक्षा वाढवली

नागपूर : मुख्यमंत्री उद्धव ठाकरे यांच्या भावनिक आवाहनानंतरही शिवसेनेत फुट सुरूच आहे. त्यातच आता आमदारांबरोबर खासदारही शिंदे गटात सहभागी होत असल्याची माहिती सूत्रांनी दिली आहे. अशातच, एकनाथ शिंदे (Eknath Shinde) यांना भाजपने (BJP)ऑफर दिली असल्याची माहिती आहे. त्यामुळे शिंदे यांच्या या पवित्र्यामुळे राज्यभरातील शिवसैनिक आक्रमक झाले आहेत. राज्यात ठिकठिकाणी शिवसैनिकांनी शिंदे यांच्याविरोधात घोषणाबाजी केली आहे. अशातच पोलिसांनी विधानसभेचे विरोधीपक्षनेते देवेंद्र फडणवीस (Devendra Fadnavis) यांच्या नागपुरातील बंगल्यासमोरील पोलीस बंदोबस्त वाढवला आहे. (Devendra Fadnavis Latest News)

एकनाथ शिंदे यांनी जवळपास 40 आमदारांसह शिवसेनेविरोधात बंड केलं आहे. शिंदेंच्या बंडाने महाविकास आघाडी सरकार अडचणीत आलं आहे. अशातच मुख्यमंत्री उद्धव ठाकरे हे लवकरच राजीनामा देतील अशी चर्चा राजकीय वर्तुळात सुरू आहे. ही बातमी समजताच राज्यभरातील शिवसैनिकांनी एकनाथ शिंदे यांच्याविरोधात घोषणाबाजी केली. यावेळी शिवसैनिक भावूक देखील झाल्याचं बघायला मिळालं.

दरम्यान, एकनाथ शिंदे गटाला मोठी ऑफर मिळाल्याची राजकीय वर्तुळात चर्चा सुरू आहे. राज्यात ८ कॅबिनेट मंत्रिपदे, तर केंद्रात २ मंत्रिपदे देण्याची शक्यता व्यक्त केली जात आहे. भाजपकडून (BJP) ही ऑफर दिली गेल्याची माहिती सूत्रांकडून देण्यात आली आहे.

त्यामुळे राज्यातील शिवसैनिक आणखीच आक्रमक झाले आहेत. हीच बाब लक्षात घेता आता कुठलाही अनूचित प्रकार घडून नये म्हणून देवेंद्र फडणवीस यांच्या नागपुरातील बंगल्याबाहेरील सुरक्षा वाढवण्यात आली आहे.

Edited By - Satish Daud