बीड: पदोन्नतीच्या दुसऱ्याचं दिवशी पीएसआयला नडला पैशाचा हव्यास!

विनोद जिरे

बीड: पैशाचा हव्यासापोटी कोण कधी काय करेल ? कोण कोणत्या मार्गाला जाईल ? हे कुणालाही सांगता येत नाही. असाच काहीसा प्रकार बीडमध्ये (Beed) समोर आलाय. पैशाचा मोहापायी एका पीएसआयला (PSI) मिळालेल्या पदोन्नतीचं साधं सेलिब्रेशन देखील करता आलं नाही. ज्या पोलीस ठाण्यात अधिकारी म्हणून काम केलं, त्याच ठाण्यात लाचखोर म्हणून आरोपी व्हावं लागलंय.

बीडच्या पाटोदा पोलीस ठाण्यात (Patoda Police Station, Beed) कार्यरत असणाऱ्या, एका पीएसआयला पदोन्नती मिळाल्याची बातमी आली. त्यांनतर त्या उपनिरीक्षकांचा मित्रपरिवारांकडून सत्कार झाला, पेढेही खाल्ले, पण लाच मागणी केल्यामुळे काल सायंकाळी त्यांच्या हाती बेड्या पडल्या. अफरोज तैमूरखाॅ पठाण (वय 36) असं त्या लाचखोर उपनिरीक्षकांचे नाव आहे.

अफरोज पठाण हे बीडच्या पाटोदा पोलीस ठाण्यात कार्यरत होते. राज्यातील उपनिरीक्षकांना सहायक निरीक्षकपदी पदोन्नतीसाठी, महसूल विभागाचे वाटप करुन पसंती क्रमांक मागविलेली आहेत. याची यादी ता. 9 मार्च रोजी अप्पर पोलीस महासंचालकांनी जाहीर केलीय. या यादीत लाचखोर अफरोज पठाण यांचेही नाव आहे. त्यामुळे ते पदाेन्नतीचे सत्कार स्वीकारत होते. एकीकडं सगळीकडून स्वागताचा, अभिनंदनाचा वर्षाव होत असतांना, पैशाचा हव्यास त्यांना चांगलाच नडलाय. बीड एसीबीच्या (ACB) पथकाने त्यांना लाच मागणी केली म्हणून अटक केलीय.

देशसेवा करून आलेल्या एका तक्रारदार फौजीवर, पाटोदा पोलीस ठाण्यात गुन्हा दाखल आहे. या गुन्ह्यात संबंधित तक्रारदाराची एक कार, बंदूक आणि मोबाईल पोलिसांनी जप्त केलाय. मात्र हे सर्व सोडण्यासाठी चांगला 'से' देण्यासाठी पठाण हे 50 हजार रुपये मागत होते. मात्र तडजोडीअंती 40 हजार रुपये देण्याचे ठरले. यादरम्यान बीड एसीबीने सापळा लावला आणि याचीच भनक पीएसआय पठाण यांना लागताच, त्यांनी "मला तुझे पैसे नको" म्हणत तिथून निघून जाण्याचा प्रयत्न केला. मात्र यादरम्यान बीड एसीबीने पठाण यांना ताब्यात घेतलं.

हे देखील पहा-

दरम्यान पीएसआय वरून सहाय्यक पोलीस निरीक्षक म्हणून नुकत्याच जाहीर झालेल्या पदोन्नतीच्या यादीत, पठाण यांचे नाव आहे. मात्र त्यांना पैशाच्या मोहापायी, मिळालेल्या पदोन्नतीचं साधं सेलिब्रेशन करता आलं नाही. ज्या पोलीस ठाण्यात अधिकारी म्हणून काम केलं, त्याच ठाण्यात आरोपी म्हणून नोंद झाली आहे. तर दिवसभर गुच्छ स्वीकारल्यानंतर हातात बेड्या पडल्यानं, लाचखोर पीएसआय पठाण यांच्या लाचखोरीची आता चांगलीच चर्चा रंगू लागलीय.