Beed News : महिला रुग्णाचा मृत्यू; नातलग संतप्त, डॉक्टरांवर गंभीर आरोप, मृतदेह २ तास रुग्णालयात ठेवला

बीड : बीडच्या जिल्हा रुग्णालयात उपचारासाठी दाखल महिला रुग्णाचा मृत्यू झाला. महिलेचा मृत्यू हा डॉक्टरांच्या हलगर्जीपणामुळे झाल्याचे कारण देत संतप्त नातेवाईकांनी मृतदेह थेट जिल्हा शल्य चिकित्सकांच्या दालनात आणून ठेवला. तब्बल दोन तास हा मृतदेह दालनात ठेवत गोंधळ घातला. 

बीडच्या (Beed) जिल्हा रुग्णालयात उपचारासाठी दाखल महिला रुग्णाचा मृत्यू झाल्याचॆ घटना घडली आहे. मात्र हा मृत्यू डॉक्टरांच्या हलगर्जीपणामुळे झाल्याचा आरोप नातेवाईकांनी केला आहे. रेखा गायकवाड असं मृत महिलेचे नाव असून विषारी द्रव प्राशन केल्याने महिलेवर जिल्हा रुग्णालयात उपचार सुरू होते. याच दरम्यान केवळ डॉक्टरांच्या हलगर्जीपणामुळे महिलेचा मृत्यू झाल्याचा आरोप नातेवाईकांनी केला. 

डॉक्टरांच्या निलंबनाची मागणी 

संतप्त नातेवाईकांनी महिलेचा मृतदेह जिल्हा शल्य चिकित्सकांच्या दालनात आणून ठेवला. तब्बल दोन तास या ठिकाणी नातेवाईकांचा गोंधळ सुरू होता. दरम्यान जोपर्यंत संबंधित डॉक्टरांच निलंबन केलं जात नाही; तोपर्यंत या ठिकाणाहून मृतदेह हलविला जाणार नाही. असा पवित्रा नातेवाईकांनी घेतला होता. मात्र कारवाईच्या आश्वासनानंतर नातेवाईकांनी सदरील महिलेचा मृतदेह ताब्यात घेतला.