बीडच्या रेवकी देवकीत झोपेतच अल्पवयीन मुलीचा मृत्यू; खून झाल्याची परिसरात चर्चा...

बीड: बीडच्या गेवराई तालुक्यातील रेवकी देवकी परिसरातील गायरणात, काही पारधी समाजातील कुटुंब राहत आहेत. त्या ठिकाणी एका मुलीचा खून झाल्याची माहिती, गेवराई (Gevrai) पोलिसांना मिळाली होती. त्यानंतर पोलिसांनी त्या ठिकाणी धाव घेतली. मात्र, कुटुंबातील व्यक्तींनी आमची मुलगी झोपेतच मृत्यू पावल्याचे सांगितले. मात्र, त्यानंतर पोलिसांनी (police) सदरील अल्पवयीन मुलीचा मृतदेह ताब्यात घेत, गेवराईच्या उपजिल्हा रुग्णालयात (hospital) शवविच्छेदनासाठी पाठविला आहे.

हे देखील पहा-

मयुरी नवनाथ चव्हाण (वय- 14) रा रेवकी देवकी असे त्या मयत अल्पवयीन मुलीचे नाव आहे. काल मयुरी हि घरातील बाजेवरच मृत अवस्थेत आढळून आल्याने खळबळ माजली होती. तसेच याठिकाणी सकाळी वाद देखील झाला असल्याची माहिती आहे. दरम्यान खून झाल्याची चर्चा झाल्याने, पोलिस घटनास्थळी दाखल झाले होते. मात्र, कुटुंबातील व्यक्तींनी हा खून नसून आमची मुलगी झोपेतच मरण पावल्याचे सांगितले आहे.

मात्र, त्यानंतर गेवराई पोलिसांनी 14 वर्षीय मयुरीचा मृतदेह गेवराईच्या उपजिल्हा रुग्णालयात शवविच्छेदनासाठी पाठवला आहे. दरम्यान शवविच्छेदनाचा अहवाल आल्यानंतर पुढील कारवाई करण्यात येणार असल्याचे, पोलिसांनी स्पष्ट केले आहे. त्यामुळे या गुढ मृत्यूने गेवराई परिसरात खळबळ उडाली आहे.

Edited By- Digambar Jadhav