Beed Crime News: नीट परीक्षेनं होत्याचं नव्हतं झालं; अपयश आलं अन् हसत्या खेळत्या मुलीनं मृत्यूला कवटाळलं

Beed News: काही दिवसांपूर्वीच नीट परीक्षेचा निकाल जाहीर झाला. या परीक्षेत अनेक विद्यार्थ्यांनी घवघवीत यश मिळवलं आहे. तर काहींच्या पदरी अपयश आलं आहे. अशात हे अपयश न पचल्याने एका १८ वर्षीय विद्यार्थिनीने आत्महत्या केली आहे. या घटनेमुळे परिसरात सर्वत्र हळहळ व्यक्त केली जात आहे. (Latest Marathi News)

सदर दु:खद घटना बीडमध्ये घडली आहे. अभ्यास करूनही नीट परीक्षेत यश न आल्याने, नैराश्यातून १८ वर्षीय विद्यार्थिनीने गळफास घेऊन आत्महत्या केली आहे. ही धक्कादायक घटना बीडच्या केज तालुक्यात असणाऱ्या साबळा गावामध्ये उघडकीस आली आहे.

विद्यार्थीनी ही एमबीबीएससाठी मागील 2 वर्षांपासून नीट परिक्षेसाठी (Neet Exam) तयारी करत होती. तीने भरपूर परिश्रम घेऊन देखील तिला नीट परिक्षेत अपयश आले. नुकताच १३ जून रोजी नीट परिक्षेचा निकाल लागला त्यात तिला कमी मार्क आले म्हणून तिने जीवन संपविले आहे. दरम्यान या घटनेने साबळा गावासह परिसरात हळहळ व्यक्त केली जात आहे.

परीक्षा (Exam) म्हटल्यावर यश अपयश या दोन्ही गोष्टी आल्याच. विद्यार्थी वर्षभर अभ्यास करुन परीक्षेला जातात आणि एका निकालावर त्यांचं पुढील भविष्य अवलंबून असतं. अशात वर्षभर अभ्यास केल्यानंतर अपयश आल्यास होणारा मानसिक त्रास प्रचंड असतो. विद्यार्थी यामुळे नैराश्यात जातात आणि टोकाचं पाऊल उचलतात.