बळीराजा थांब रे...! कर्जबाजारीपणाला कंटाळून ३८ वर्षीय शेतकऱ्याने संपवलं जीवन

बीड : राज्यात कर्जबाजारी शेतकऱ्यांच्या (Farmer) आत्महत्येचं सत्र सुरूच आहे. लातूरमधील औसा तालुक्यात एका कर्जबाजारी शेतकऱ्याने आत्महत्या केल्याची घटना ताजी असतानाच, आता बीडमध्ये (Beed) कर्जबाजारीपणा आणि आर्थिक नैराश्यातून एका 38 वर्षीय विवाहित तरुणाने गळफास घेऊन आत्महत्या केली. ही दुर्दैवी घटना बीडच्या राजेगावमध्ये उघडकीस आली. (Beed Latest News)

सुग्रीव देवीदास जाधव (वय 38) रा. राजेगाव असं आत्महत्या केलेल्या विवाहित तरुणाचे नाव आहे. मयत सुग्रीव जाधव यांनी आपल्या स्वतःच्या राहत्या घरात, एका रॉडला दोरीने गळफास घेऊन आत्महत्या केली. तर घटनेची माहिती कळताच केज पोलीस घटनास्थळी दाखल झाले होते.

यावेळी पोलिसांनी मृतदेह शवविच्छेद करण्यासाठी नांदूरघाट रुग्णालयात दाखल करत घटनेचा पंचनामा केलाय. याप्रकरणी केज पोलीस ठाण्यामध्ये मृत्यूची आकस्मात नोंद करण्यात आली आहे. दरम्यान मयत सुग्रीव जाधव यांच्या पश्चात पत्नी, एक 14 वर्षाची मुलगी व दुसरा 12 वर्षाचा मुलगा, असा परिवार आहे.

लातूरमध्येही शेतकऱ्याची आत्महत्या

औसा तालुक्यातील मसलगा (खु) येथील शेतकरी संतोष भाऊराव पाटील यांनी स्वतः च्या शेतातील पत्र्याच्या शेडमध्ये दोरीच्या साहाय्याने गळफास लावून आत्महत्या केल्याची दुर्देवी घटना उघडकीस आली आहे. मयत शेतकरी संतोष पाटील यांच्या कुटुंबात १ हेक्टर ३२ आर. जमीन असून याप्रकरणी मृताच्या नातेवाईकांनी दिलेल्या माहितीनुसार मयत संतोष पाटील यांच्या नावे जिल्हा मध्यवर्ती बँकेचे १ लाख ९७ हजार कर्ज आहे.

तसेच अन्य बँकेचेही कर्ज असल्याने या कर्जबाजारीपणामुळे त्यांनी आत्महत्या केली आहे. संतोष पाटील यांच्या मृतदेहाचे बेलकुंड येथील प्राथमिक आरोग्य केंद्रात शवविच्छेदन करण्यात आले आहे. याप्रकरणी बाळासाहेब पाटील यांच्या माहितीवरून किल्लारी पोलिसांत आकस्मिक मृत्यूची नोंद करण्यात आली आहे.

Edited By - Satish Daud