बीडमध्ये दारुड्या मुलाकडून आईला बेदम मारहाण; मारहाणीत आईचा जागीच मृत्यू

बीड - दारुड्या मुलाने जन्मदात्या आईला रात्री बेदम मारहाण केल्याने, वृद्ध आईचा जागीच मृत्यू झाल्याची धक्कादायक अन संतापजनक घटना, बीडच्या चौसाळा गावामध्ये आज उघडकीस आली आहे. तर आईचा मृत्यू झाल्याचं लक्षात येतात, नराधम आरोपी मुलाने घटनास्थळावरून पलायन केलं होतं. मात्र पोलिसांच्या दीड तासाच्या शोधमोहिमेनंतर, अखेर आरोपीच्या मुसक्या आवळण्यात नेकनूर पोलिसांना यश आले आहे.

हे देखील पहा -

प्रयागाबाई पांडुरंग मानगिरे वय 70 वर्ष असं मयत वृद्ध आईचं नाव आहे. तर मदन पांडुरंग मानगिरे वय 28 वर्ष असं नराधम आरोपी मुलाचे नाव आहे. दारुच्या नशेत असणाऱ्या आरोपी मदन मानगिरे याने, मयत आई प्रयागबाई यांना, रात्री 11 ते 12 च्या दरम्यान लागडी मुसळाने जबर मारहाण केली. यामध्ये प्रयागबाई यांचा जागीच मृत्यू झाला. रात्री केलेल्या मारहाणीत आईचा मृत्यू झाला आहे, ही बाब आज सकाळी आरोपी मदनच्या लक्षात येताच, त्याने घरातून पळ काढला.

बीड-गेवराई मार्गे तो महाकाळा येथे सासरवाडीत पोहचला. तिथून तो अन्य ठिकाणी फरार होणार होता. मात्र याची माहिती नेकनूर पोलीस ठाण्याचे सपोनि.लक्ष्मण केंद्रे यांना मिळताच, त्यांनी शहागड येथून आरोपी मदन यास ताब्यात घेतले. त्याचबरोबर एक दुचाकी देखील ताब्यात घेतली आहे. दरम्यान मयत वृद्धेचे शवविच्छेदन झाले असून आरोपी नराधम मुलावर गुन्हा दाखल करण्याची प्रक्रिया, नेकनूर पोलिस ठाण्यात सुरू आहे.

Edited By : Krushnarav Sathe