मंत्री शंकरराव गडाखांसह मुलाच्या हत्येचा कट; ऑडिओ क्लिप व्हायरल

अहमदनगर: शिवसेनेचे (Shivsena) मंत्री शंकरराव गडाख (Shankarao Gadakh ) यांचे पीए राहुल राजळे यांच्यावर झालेल्या गोळीबाराचं प्रकरण ताजे असतानाच आता मंत्री गडाख व त्यांचे पुत्र उदयन यांच्यावर गोळी झाडण्या संदर्भात संभाषण असणारे ऑडिओ क्लिप व्हायरल झाली आहे. या क्लिपने अहमदनगर जिल्ह्यात खळबळ उडाली आहे. यासाठी २१ इस्रायली बनावटीच्या पिस्तुल आणल्याचा उल्लेख व्हायरल क्लिपमध्ये असल्याने पोलिसांसमोर (Police) तपासाचे आव्हान उभे ठाकले आहे. विशेष म्हणजे आपण पोलीस डिपार्टमेंटलाही सापडणार नाही असा दावा यातील व्यक्ती ऑडिओ क्लिपमध्ये करत आहे. ऑडिओ क्लिप मधील व्यक्ती अद्याप कोण हे समजू शकलेलं नाही.

मंत्री शंकरराव गडाख यांचे पीए राहुल राजळे यांच्यावर नेवासा तालुक्यातील लोहगाव शिवारात काही गुंडांनी पाच गोळ्या झाडल्या होत्या. त्यातील दोन गोळ्या राजळे यांच्या शरीरात घुसल्या आहेत. त्यांच्यावर पुणे येथे उपचार सुरू आहे. या प्रकरणात चार जणांवर गुन्हा दाखल झाला असून एकाला पोलिसांनी (Police) अटक केली आहे. पण आता एक ऑडिओ क्लिप व्हायरल झाली आहे.

या क्लिपमध्ये मंत्री गडाख आणि त्यांचे पुत्र उदयन यांना ठार मारून टाकेन असा उल्लेख आहे. यासाठी अनधिकृतपणे इस्रायली बनावटीचे २१ पिस्तूल आणल्या असून, त्यापैकी २१ पिस्तूल आधीच वाटल्या असल्याचा उल्लेख आहे.तर एक पिस्तुल माझ्याजवळ आहे. ऑडिओ क्लिप मध्ये अज्ञात व्यक्ती बोलत आहे. आता २० पिस्तूल नेवासा तालुक्यात कोणाकोणाला वाटल्या आहेत, याचा तपास करण्याचे आव्हान पोलिसांसमोर (Police) आहे.