Akola : मुदतबाह्य कीटकनाशकांची पुन्हा नवी पॅकिंग; अकोल्यात समोर आला धक्कादायक प्रकार

अक्षय गवळी 

अकोला : पिकांवर पडलेली रोगराई घालविण्यासाठी शेतकरी कीटकनाशक घेऊन फवारणी करत आहे. यामुळे सध्या मोठ्या प्रमाणात कीटकनाशक खरेदी केले जात आहे. मात्र अकोल्यात मुदतबाह्य कीटकनाशके बॉटल फोडून नव्या बॉटलमध्ये टाकत असतानाचा धक्कादायक प्रकार उघडकीस आला आहे. अशा प्रकारातून शेतकऱ्यांची फसवणूक करण्यात येत पुन्हा एकदा उघडकीस आले आहे. 

अकोल्यातल्या एमआयडीसी भागात व्हि.जे. क्रॉप सायन्स प्रायव्हेट लिमिटेड कंपनीच्या ठिकाणी हा प्रकार सुरु होता. याठिकाणी सुरु असलेल्या कीटकनाशके उत्पादन स्थळावर कारवाई करण्यात आली. अकोला जिल्हा कृषी विकास अधिकारी तुषार जाधव यांच्या भरारी पथकाने ही कारवाई केली. या ठिकाणी मुदतबाह्य कीटकनाशकांचा साठा मोठ्या प्रमाणात होता. या साठ्याची विक्री करण्याच्या अनुषन्गाने नवीन पॅकिंग केलेल्या बाटल्यांमध्ये ते भरले जात होते. 

२२ लाख रुपयांचा साठा जप्त 

कंपनीत उपस्थित कर्मचारी व मजूर वर्गाकडून मुदत बाह्य कीटकनाशके बॉटल फोडून त्यामधील कीटकनाशके नवीन बॉटलमध्ये टाकणे, त्याचे वजन करणे व त्यावर नवीन बॅच क्रमांक व उत्पादन दिनांक नवीन स्टीकर लावणे, अशाप्रकारचं कामकाज सुरू असल्याचे आढळून आले आहे. यासंदर्भात कीटकनाशके कायद्या अंतर्गत गुन्हे दाखल करून मुदतबाह्य ज्याची किंमत २१ लाख ९५ हजार रुपयांचा साठा कृषी विभागाने जप्त केला.

कीटकनाशकांचे नमुने प्रयोगशाळेत तपासणीसाठी 

दरम्यान कृषी विभागाच्या पथकाने या उत्पादन स्थळावरून आठ कीटकनाशकांचे नमुने घेण्यात आले आहेत. ते तपासणीसाठी प्रयोगशाळेत पाठवण्यात आले आहे. याबाबत प्राप्त अहवालानुसार योग्य ती कारवाई करण्यात येणार असून याप्रकरणी एमआयडीसी पोलीस स्टेशन येथे गुन्हा दाखल केला असून पुढील तपास सुरू आहे.