Akola : अकोल्यात तीन वाहनांचा विचित्र अपघात, एकाचा जागीच मत्यू,६ गंभीर जखमी

अक्षय गवळी, अकोला प्रतिनिधी

Akola Accident News : अकोल्याच्या आपातापा रोडवर तीन वाहनांचा भीषण अपघात झाला. या दुर्घटनेत एकाचा जागीच मृत्यू झाला, तर सहा जण गंभीर जखमी आहेत. अपघातानंतर घटनास्थळी मोठी गर्दी झाली असून, स्थानिक नागरिकांनी मदत करत जखमींना सरकारी रुग्णालयात हलविले. तर बोरगाव पोलीस घटनास्थळी दाखल न झाल्याने नातेवाईकांनी रोष व्यक्त केला

अकोला जिल्ह्यातील आपातापा रोडवर शुक्रवारी सायंकाळी सातच्या सुमारास भीषण अपघात झाला. या अपघातात तीन वाहने परस्परांना धडकल्याने मोठी दुर्घटना घडली. यामध्ये एका व्यक्तीचा जागीच मृत्यू झाला, तर सहा जण गंभीर जखमी झाले आहेत. अपघातस्थळी विद्युत मंडळाच्या खांब बसवण्याचे काम सुरू होते. याच दरम्यान, अकोल्याहून आपातापाकडे जाणारी बोलेरो, रस्त्याच्या बाजूला उभ्या असलेल्या ट्रॅक्टर ट्रॉलीला धडकली. त्याचवेळी, अकोल्याहून म्हैसागडे जाणारी स्विफ्ट डिझायर देखील या गोंधळात सापडून अपघातग्रस्त झाली. या भीषण अपघातात आपातापा येथील शंकर रामदास बापटे यांचा जागीच मृत्यू झाला, तर स्विफ्ट डिझायरच्या चालकासह सहा जण गंभीर जखमी झाले आहेत.

घटनेची माहिती मिळताच स्थानिक नागरिकांनी घटनास्थळी धाव घेतली आणि मदतकार्य सुरू करत मृतकास सर्व विच्छेदनासाठी तसेच जखमींना अकोला सर्वोपचार रुग्णालयात हलविण्यात आले असून त्यांच्यावर उपचार सुरू आहे. अपघातानंतर घटनास्थळी पोलीस दाखल झाले असून, त्यांनी वाहतूक सुरळीत करण्यास सुरुवात केली आहे. जखमींना तातडीने रुग्णालयात दाखल करण्यात आले असून, त्यांच्यावर उपचार सुरू आहेत. या मार्गावर वारंवार होणाऱ्या अपघातांमुळे नागरिकांमध्ये भीतीचे वातावरण आहे.

स्थानिक प्रशासनाने योग्य सुरक्षा उपाययोजना कराव्यात, अशी मागणी होत आहे. रस्त्याच्या दुतर्फा असलेल्या अनधिकृत अडथळ्यांमुळे वाहनचालकांचा अंदाज चुकतो, परिणामी अशा दुर्घटना घडतात. पोलीस प्रशासनाने वाहनचालकांना वेगमर्यादा पाळण्याचे आणि सतर्क राहण्याचे आवाहन केले आहे. तसेच, या अपघाताचा सखोल तपास सुरू असल्याची माहिती पोलिसांनी दिली आहे.