Ahilyangar Flood : लेकासाठी बाप निसर्गाशी लढला; पुरातूनही वाट काढत दवाखाना गाठला

सुशील थोरात, साम टीव्ही

राज्यातील विविध भागात पावसाने झोडपून काढलं आहे. मुसळधार पावसामुले पिकांना मोठा फटका बसला आहे. तर राज्यातील काही भागात कमरे एवढ्या पाणी साचलं आहे. कोसळधार पावसामुळे राज्यातील अनेक भागातील जनजीवन विस्कळीत झालं आहे. अनेकांचे संसार रस्त्यावर आले आहेत. याच मुसळधार पावसातही एका बापाने जीवघेणा प्रवास करून मुलाला दवाखान्यात नेलं. या बापाने मुलासाठी केलेल्या धडपडीचा व्हिडिओ सोशल मीडियावर व्हायरल झाला आहे. ही घटना अहिल्यानगरमधील पाथर्डी तालुक्यातील आहे.

अहिल्यानगर जिल्ह्याच्या दक्षिण भागात म्हणजेच शेवगाव ,पाथर्डी आणि जामखेड भागात पावसामुळे जनजीवन विस्कळीत झालं आहे. अनेक ठिकाणी रस्ते वाहून गेल्याने ग्रामस्थांना कसरत करत आहेत. तर काही ठिकाणी जीवघेणा प्रवास करून एका ठिकाणावरून दुसऱ्या ठिकाणी जावे लागत आहे. पाथर्डी तालुक्याला पावसाचा सर्वात जास्त फटका बसला आहे. तर अनेक ठिकाणी रस्ते वाहून गेले आहेत.

अनेक शेतांमध्ये पाणी साचलेले आहे. अहिल्यानगरमधील पाथर्डी तालुक्यातील घाटशिरस येथील एक व्हिडिओ सध्या चांगलाच व्हायरल होत आहे. तर लहान चिमुकल्याला दवाखान्यात घेऊन जाण्यासाठी कमेरे एवढ्या पाण्यातून कसरत करत वडील लहान चिमुकल्याला दवाखान्यात नेत असल्याचा हा व्हिडिओ आहे. ग्रामीण भागात अत्यंत बिकट अवस्था झाली आहे. प्रशासनाने लवकरात लवकर सर्व ठिकाणी जाऊन रस्ते दुरुस्त करून अथवा पर्यायी रस्ते खुले करून द्यावेत, असे मागणी ग्रामस्थ करत आहेत.

धरणाचे स्वयंचलित गेट उघडले, पैनगंगा नदीकाठावरील गावांचं नुकसान

बुलढाणा जिल्ह्यातील पैनगंगा नदीकाठच्या शेतकऱ्याचे पिकांचे मोठे नुकसान झालंय. पैनगंगा नदीवर असलेले येळगाव धरणाचे गेट स्वयंचलित आहेत. त्यामुळे धरण भरल्यानंतर ते गेट उघडले जातात. त्यामुळे पैनगंगा नदीला महापूर येतो आणि नदीकाठी असलेल्या शेतात पाणी जाऊन पिकांचे मोठे नुकसान होते. ते गेट मानवनिर्मित करावे, तसेच नुकसान झालेल्या शेतकऱ्यांना नुकसान भरपाई द्यावी, अशी मागणी करत शेतकरी आज सकाळपासून शेतातच साचलेला पाण्यात आंदोलनाला बसले आहे.