Shocking News : रुग्णालयातून बाहेर निघाल्यानंतर ६ दिवस रस्त्यावर, डॉक्टरांच्या दुर्लक्षामुळे महिलेचा मृत्यू, नेमकं काय घडलं?

सागर निकवाडे, साम प्रतिनिधी नंदुरबार

नंदुरबारमध्ये संतापजनक घटना घडली आहे. जिल्ह्यातील शहादा तालुक्यातील ग्रामीण रुग्णालय रामभरोसे असून हॉस्पिटलमध्ये गंभीर निष्काळजीपणामुळे एका वयोवृद्ध महिलेचा मृत्यू झाल्याची धक्कादायक घटना समोर आली आहे. या घटनेने नागरिकांमध्ये संतापाची लाट उसळली आहे. या प्रकरणी नागरिकांनी चौकशीची मागणी केली आहे.

मिळालेल्या माहितीनुसार, नंदुरबार येथील शहादा तालुक्यातील ग्रामीण रुग्णालयात ५० वर्षांची महिला रुग्णालयात उपचारासाठी दाखल होती. मात्र, तब्येतीत सुधारणा न झाल्याने ती रुग्णालयाच्या बाहेर आली आणि रुग्णालयापासून अवघ्या पाचशे मीटर अंतरावर गेल्यानंतर सहा दिवसांपासून रस्त्याच्या कडेला पडून होती. स्थानिक नागरिकांच्या म्हणण्यानुसार, त्या महिलेची अवस्था अत्यंत वाईट असूनही रुग्णालयातील डॉक्टरांनी तिला कोणतीही मदत केली नाही.

डॉक्टरांनी तिच्या स्थितीकडे दुर्लक्ष केले, इतकेच नव्हे तर काही डॉक्टरांनी रस्त्यावर पडलेल्या महिलेच्या शेजारून जातानाही थांबून चौकशी केली नाही, असा आरोप नागरिकांनी केला आहे. शेवटी त्या महिलेचा मृत्यू झाला. या निष्काळजीपणाचा मुद्दा इन्कलाब फाउंडेशनने गंभीरपणे घेतला असून संस्थेच्या पदाधिकाऱ्यांनी नंदुरबारच्या जिल्हाधिकारी मिताली सेठी यांची भेट घेतली. त्यांनी या घटनेबाबत सविस्तर माहिती देत निष्काळजी डॉक्टरांवर कठोर कारवाईची मागणी केली.

जिल्हाधिकारी मिताली सेठी यांनी या घटनेची दखल घेत तातडीने चौकशीचे आदेश देण्याचे आश्वासन दिले असून, दोषी डॉक्टरांवर योग्य ती कारवाई करण्यात येईल असे सांगितले आहे. या घटनेमुळे शहादा तालुक्यात संतापाची लाट उसळली असून, आरोग्य विभागाच्या कार्यपद्धतीवर नागरिक प्रश्न उपस्थित करत आहेत. ग्रामीण भागातील रुग्णांना योग्य उपचार आणि मानवी वागणूक मिळावी, हीच सर्वांची मागणी आहे.