सांगली|ता: २५ एप्रिल २०२४
विशाल पाटील यांनी बंडखोरी केल्यानंतर आज काँग्रेस पक्षाचा मेळावा सांगलीमध्ये पार पडत आहे. आजच्या मेळाव्याला काँग्रेसचे राज्यातील प्रमुख नेते उपस्थित राहणार आहेत. यावेळी जिल्ह्यातील नेत्यांची मते लक्षात घेऊन विशाल पाटील यांच्यावर कारवाई होण्याची शक्यता आहे.
याबाबत सविस्तर माहिती अशी की, सांगली लोकसभा मतदारसंघातून बंडखोरी केलेले काँग्रेस प्रदेश उपाध्यक्ष विशाल पाटील यांच्यावर पक्षातून निलंबनाची टांगती तलवार आहे. तसे संकेतही काँग्रेस प्रदेशाध्यक्ष नाना पटोले यांनी दिले आहेत. याच पार्श्वभूमीवर नाना पटोले यांच्यासह विधिमंडळ गटनेते बाळासाहेब थोरात आणि माजी मुख्यमंत्री पृथ्वीराज चव्हाण यांच्या उपस्थितीत आज काँग्रेसचा संवाद मेळावा घेतला जाणार आहे.
त्यामध्ये जिल्ह्यातील काँग्रेस नेत्यांनी मते जाणून घेऊन विशाल पाटील यांच्यावरील कारवाईचा निर्णय होणार आहे. सांगलीच्या भावी नाट्य मंदिरामध्ये हा मेळावा पार पडत आहे. त्यामुळे आज अपक्ष उमेदवार विशाल पाटील यांच्याबाबत पक्षश्रेष्ठी काय निर्णय घेणार? याकडे सर्वांचे लक्ष लागले आहे.
सांगलीत तिरंगी लढत..
दरम्यान, सांगली लोकसभा मतदार संघात महाविकास आघाडीकडून डबल महाराष्ट्र केसरी चंद्रहार पाटील यांना उमेदवारी देण्यात आली आहे. त्यांच्यासमोर महायुतीचे संजय काका पाटील यांचे आव्हान असेल. अशातच काँग्रेस नेते विशाल पाटील यांनीही अपक्ष उमेदवारी अर्ज दाखल केल्याने सांगलीतील लढत तिरंगी होणार असल्याचे स्पष्ट झाले आहे.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.