Fruits For Kidney : आहारात या ६ फळांचा समावेश केल्यास मूत्रपिंडासाठी ठरतील वरदान, जाणून घ्या

मूत्रपिंड हे आपल्या शरिराच्या सर्वात महत्त्वाच्या भागांपैकी एक आहे. म्हणूनच त्याचे निरोगी असणे फार महत्त्वाचे आहे. अशात वेगाने बदलत चाललेल्या जीवनशैलीत अस्वस्थ खाण्याचे प्रमाण वाढत चालले आहे. याचा थेट परिणाम आपल्या मूत्रपिंडावर होतो. यामुळे योग्य काळजी न घेतल्यास मूत्रपिंडाशी संबंधीत अनेक गंभीर आजारांना सामोरे जावे लागू शकते. पण तुम्ही तुमच्या रोजच्या आहारात काही फळांचा समावेश केल्यास यापासून वाचू शकता.

अनेकजण उत्तम आरोग्यासाठी डाएटिंग करत असतात. तुम्ही तुमच्या डाएटिंगमध्ये इतर आहारांसह सफरचंद, बेरी, द्राक्षे यांसारख्या फळांचा समावेश केल्यास ते मूत्रपिंडासाठी एक आरोग्यदायी वरदान ठरू शकतात. सफरचंदामध्ये मोठ्या प्रमाणात फायबर असते. जे कोलेस्टेरॉल आणि जळजळ कमी करण्यास मदत करतात. ब्लूबेरी, स्ट्रॉबेरी, रास्पबेरी यांसारख्या फळांमध्ये असलेले अँटीऑक्सिडंट्स ऑक्सिडेटिव्ह तणावापासून मूत्रपिंडाचे संरक्षण करतात.

द्राक्षेही मूत्रपिंडाच्या आरोग्यासाठी उत्तम पर्याय ठरतात. यामध्ये रेसवेराट्रोल असते जे हृदय आणि मूत्रपिंडाला नैसर्गिक आरोग्य प्रदान करते. क्रॅमबेरी हे फळ मूत्रपिंडाला कोणतेही संसर्ग होण्यापासून वाचवते. पीच हे फळ अ आणि क जीवनसत्त्वांनी भरपूर असते जे पचनसंस्था सुधारतात. हे फळ मूत्रपिंडाच्या रूग्णांसाठी एक सर्वोत्तम पर्याय आहे. मुख्यतः या सर्व फळांमध्ये पोटॅशियमची पातळी खुपच कमी असते. मूत्रपिंडाच्या रूग्णांसाठी पोटॅशियमयुक्त आहार घेणे धोक्याचे ठरू शकते.

कारण निकामी झालेले मूत्रपिंड रक्तातून पोटॅशियम काढून टाकण्याचे काम करू शकत नाही. रक्तात पोटॅशियमचे प्रमाण वाढल्यास हायपरक्लेमिया होण्याची शक्यता असते. ज्यामुळे स्नायू कमकुवत होणे, स्नायूंना पेटके येणे आणि हृदयांच्या ठोक्यातील अनियमितता यांसारख्या धोकादायक समस्या उद्भवू शकतात. यामुळे हृदयविकाराचा झटका किंवा मृत्यू देखील होऊ शकतो. यासाठी तुमच्या आहारात योग्य बदल करणे अधिक महत्त्वाचे आहे.

टीप : वरील माहिती आम्ही फक्त वाचक-प्रेक्षकांपर्यंत पोहचवत आहोत. याचं समर्थन अथवा दावा करत नाही. त्यामुळे कोणतेही उपचार, डाएट आणि औषधं तज्ज्ञांच्या सल्ल्यानं घ्यावीत.