इकडे लक्ष द्या! तुमच्या खिशातील 25 टक्के रक्कम होतेय फक्त इंधनावर खर्च!

पुणे: सध्या पेट्रोल-डिझेलसह स्वयंपाकाचा गॅस आणि सीएनजी या सर्व इंधनांची किंमत गेल्या काही दिवसांत  झपाट्याने वाढली आहे. जगातील सर्वात महाग एलपीजी सध्या भारतामध्ये मिळत असल्याचे निदर्शनास येत आहे, या दरवाढीमुळे सर्वसामान्यांचे मात्र कंबरडे मोडले आहे. मागील काही दिवसांत इंधनाच्या किमतीत मोठी वाढ झालीय, घरगुती स्वयंपाकासाठी वापरण्यात येणाऱ्या एल पी गॅस ची किंमत हजाराच्या घरात जाऊन पोहोचली आहे.  ग्रामीण भागात तर अनेकांनी आता गॅसऐवजी चुलीवर स्वयंपाक करण्यास सुरुवात केली आहे.

२०१४ नंतर एलपीजी सिलिंडरच्या किमतीत जवळपास दुप्पट वाढ झाली आहे. आजच्या घडीला दरडोई उत्पन्नाच्या तुलनेत विचार केला तर आपल्याला खरेदी करावा लागणारा एलपीजी किंवा पेट्रोल आणि डिझेल हे जगातील सगळ्यात महाग दरांमध्ये येतात. दरडोई उत्पन्नाच्या तुलनेत विचार केल्यास देशातील नागरिक एलपीजी सिलिंडरसाठी जगात सर्वाधिक किंमत मोजताहेत, एलपीजीसाठी भारताला आंतरराष्ट्रीय डॉलरमध्ये ३.५ डॉलर मोजावे लागतात. इंधनाच्या दरावर सरकारने नियंत्रण आणावे अशी अपेक्षा सर्वसामान्य नागरिकांची आहे

इंधनाची किंमत इतकी जास्त आहे की आपल्याकडे एखादा नागरिक दिवसभरातील जे उत्पन्न जे कमावतो त्यापैकी सर्वाधिक खर्च हा इंधनावर होतो, म्हणजेच समजा एक अमेरिकन नागरिक एक लिटर पेट्रोल भरतो तेव्हा त्याची किंमत ही त्याच्या दिवसाच्या दरडोई उत्पन्नाच्या ०.६ टक्के एवढी असते.

स्पेनमध्ये ही किंमत उत्पन्नाच्या २.२ टक्के असते. जेव्हा भारतातील नागरिक गाडीत एक लिटर पेट्रोल भरतो तेव्हा तो त्याच्या दिवसभरात एकूण उत्पन्नाच्या २३.५ टक्के इतकी किंमत मोजत असतो, तो डिझेलसाठी २०.९ टक्के व एलपीजीसाठी १५.६ टक्के किंमत मोजत आहे. म्हणजेच जर भारतीय नागरिक दिवसाला १०० रुपये कमावत असेल तर त्याला एक लिटर पेट्रोलसाठी २३ रुपये खर्च करावे लागतात. याचा अर्थ रोजच्या पगारातील 25 टक्के रक्कम ही इंधनावर खर्च होते आहे.

Edited By: Pravin Dhamale