Vande Bharat Train: देशामध्ये किती वंदे भारत ट्रेन धावतात, आतापर्यंत किती जणांनी केला प्रवास?

सेमी हायस्पीड वंदे भारत ट्रेन २०१९ मध्ये सुरू झाल्या. आता देशातील बहुतेक राज्यांमध्ये वंदे भारत ट्रेन धावतात.

टप्प्या टप्प्याने वेगवेगळ्या राज्यांमध्ये वंदे भारत ट्रेन सुरू केल्या जात आहेत. पीएम मोदी १५ सप्टेंबर रोजी झारखंडमधील जमशेदपूर येथून १० नवीन वंदे भारत ट्रेनला हिरवा झेंडा दाखवतील.

रेल्वे प्रशासनाने दिलेल्या माहितीनुसार, देशात वंदे भारत ट्रेन सुरु झाल्यापासून ते २० ऑगस्टपर्यंत या ट्रेनमधून सुमारे ३.१७ कोटी लोकांनी प्रवास केला आहे.

रेल्वे प्रशासनाने दिलेल्या माहितीनुसार, सध्या देशात ५४ वंदे भारत ट्रेन धावत असून २० ऑगस्टपर्यंत त्यांनी ३५,४२८ ट्रिपमध्ये ३.१७ कोटी प्रवाशांनी प्रवास केला.

फेब्रुवारी २०१९ मध्ये वंदे भारत ट्रेन सुरू झाल्या. वंदे भारत ट्रेनचे जाळे देशातील २८० जिल्हे आणि २४ राज्यांमध्ये पसरले आहे. २०२३-२४ या आर्थिक वर्षात वंदे भारत ट्रेनने पृथ्वीभोवती ३१० फेऱ्या माराव्या ऐवढा प्रवास केला.

दक्षिण मध्य रेल्वेचे प्रमुख पीआरओ ए श्रीधर यांनी सांगितले की, वंदे भारत ट्रेनचे जाळे सतत वाढवत ​​जात आहे आणि आणखी नवीन ट्रेन येत आहेत.

मेक इन इंडिया उपक्रमांतर्गत विकसित केलेली वंदे भारत एक्स्प्रेस लाखो लोकांना लक्झरी अनुभवासह परवडणारा प्रवास प्रदान करते.

देशातील पहिली वंदे भारत ट्रेन १५ फेब्रुवारी २०१९ रोजी नवी दिल्ली ते वाराणसी दरम्यान सुरू झाली. सध्या देशात फक्त चेअर कार क्लासमध्ये वंदे भारत सुरू आहे.

या महिन्याच्या सुरुवातीला रेल्वे मंत्री अश्विनी वैष्णव यांनी सांगितले होते की, वंदे भारत स्लीपर ट्रेनची चाचणी येत्या दीड ते दोन महिन्यांत सुरू होईल. ही ट्रेन तीन महिन्यांनी सेवेत येईल.

वंदे भारत स्लिपर, वंदे चेअर, वंदे मेट्रो आणि अमृत भारत या चार ट्रेन येत्या काळात आपल्या देशवासीयांना चांगली सेवा देतील. या नव्या ट्रेनमध्ये आणखी चांगल्या सुविधा मिळणार आहे.