Thandel Trailer : 'पुष्पा का बाप...'; नागा चैतन्य-साई पल्लवीच्या 'थंडेल' चित्रपटचा ट्रेलर लॉन्च

Thandel Trailer : दाक्षिणात्य अभिनेता नागा चैतन्यच्या 'थंडेल' या चित्रपटाचा ट्रेलर रिलीज झाला आहे. नागा चैतन्य आणि साई पल्लवी स्टारर 'थंडेल' हा एक अ‍ॅक्शन ड्रामा आहे जो एका मच्छीमाराची कहाणीवर आधारित आहे. त्याला आंतरराष्ट्रीय महासागरात पाकिस्तानी सैन्याने पकडले जाते आणि त्यामुळे त्याच्यावर ओढवणाऱ्या संकटाचे वर्णन करण्यात आले आहे.

या चित्रपटात नागा आणि साई मुख्य भूमिकेत आहेत, तर संदीप आर वेद खलनायकाच्या भूमिकेत दिसणार आहेत. 'थंडेल' हा एक रोमँटिक थ्रिलर चित्रपट आहेत. तसेच त्यात देशभक्तीची भावना आणि अनेक भावनिक दृश्ये ही प्रेक्षकांनापाहायला मिळणार आहेत. ट्रेलर पाहिल्यानंतर, चाहते आधीच ब्लॉकबस्टर आणि २०२५ मधील सर्वात मोठा चित्रपट म्हणत आहेत. अनेकांच्या प्रतिक्रियांमध्ये असेही म्हटले आहे की हा चित्रपट 'पुष्पाचा बाप' आहे.

नागा चैतन्य आणि साई पल्लवीची केमिस्ट्री

नागा चैतन्यने प्रेक्षकांना वेड लावले आहे तर साई पल्लवी तिच्या आकर्षणाने सर्वांना मंत्रमुग्ध केले आहे. नागा चैतन्य आणि साई पल्लवी यांच्यातील केमिस्ट्री प्रेक्षकांना खूप आवडली आहे. याआधी, नागा चैतन्य आणि साई पल्लवी यांनी 'लव्ह स्टोरी' या चित्रपटामध्ये एकत्र काम करून प्रेक्षकांची मने जिंकली होती आणि ही जोडी पुन्हा एकदा प्रेक्षकांचे मनोरंजन करण्यास सज्ज झाली आहे.

'थंडेल' रिलीज डेट

चंदू मोंडेटी दिग्दर्शित 'थंडेल' हा चित्रपट गीता आर्ट्सच्या बॅनरखाली बनवण्यात आला आहे आणि अल्लू अरविंद यांनी त्याची निर्मिती केली आहे. 'थंडेल' हा चित्रपट ७ फेब्रुवारी रोजी थिएटरमध्ये प्रदर्शित होणार आहे.