Taarak Mehta Ka Ooltah Chashmah : तारक मेहता...मध्ये होणार 'या' नवीन तारक मेहताची एन्ट्री

मुंबई : टीव्ही जगातील प्रसिद्ध नाव म्हणजे शैलेश लोढा(shailesh lodha). जो गेल्या १४ वर्षांपासून 'तारक मेहता का उल्टा चष्मा'मध्ये मुख्य भूमिका साकारत आहे. शैलेश लोढा मालिकेच्या सुरुवातीपासून मेहता साहेबांच्या भूमिकेत दिसला आणि त्याच्या या भूमिकेला प्रेक्षकांचे भरभरून प्रेम मिळाले आहे. पण काही महिन्यांपूर्वी अचानक बातमी आली की शैलेश लोढाने आता 'तारक मेहता का उल्टा चष्मा'(Taarak Mehta Ka Ooltah Chashmah) या शोला अलविदा केलं आहे आणि आता तो या शोचा भाग नसेल. काही वेळातच या बातमीलाही दुजोरा मिळाला आणि आता या भूमिकेसाठी निर्मात्यांना नवीन चेहरा सापडल्याची माहिती समोर आली आहे.

मीडिया रिपोर्ट्सनुसार, टीव्ही आणि चित्रपटांमधील प्रसिद्ध अभिनेता राज पुरोहित आता नवीन मेहता साहेब बनणार आहे. राज 'बालिका वधू', 'जब हम तुम', 'लगी तुझसे लगन' यांसारख्या प्रसिद्ध मालिकांमध्ये दिसला होता. याशिवाय त्याने 'ओह माय गॉड' सारख्या चित्रपटातही काम केले आहे. अभिनय विश्वातील राज पुरोहित एक प्रसिद्ध नाव आहे. आता तो टीव्हीवरील सर्वात लोकप्रिय शो 'तारक मेहता का उल्टा चष्मा'मध्ये दिसणार आहे. याविषयी अद्याप कोणतीही अधिकृत घोषणा करण्यात आलेली नसली तरी या वृत्ताला दुजोरा मिळाला असून, लवकरच त्याच्या या शोमध्ये एन्ट्रीचा प्लान तयार करण्यात आला आहे.

अभिनेता आणि कवी शैलेश लोढा याने शो का सोडला? असा सवाल सर्व जण त्याला विचारत आहेत. यामागचे कारण अद्याप कोणीही सांगितले नसले तरी मीडिया रिपोर्ट्समध्ये असे म्हटले जात आहे की, असित मोदी याच्यासोबत त्याच्या नवीन करारावरून मतभेद झाले होते, त्यामुळे त्याने हा शो सोडण्याचा निर्णय घेतला. त्यानंतर अजून काही कलाकारांनी हा शो सोडण्याचा निर्णय घेतला. जेठालालचे पात्र साकारणाऱ्या दिलीप जोशी याच्याशी देखील शैलेश लोढाचे वाद झाले होते. या कारणासाठी सुद्धा त्याने शो सोडला असल्याचे बोलले जात आहे.