Child Artist Arambhi Ubale: ‘सन नेटवर्क’च्या ‘सन मराठी’ वाहिनीवरील 'सावली होईन सुखाची' या नव्या मालिकेने प्रेक्षकांच्या मनात घर करायला सुरुवात केलेली आहे. ‘सोहळा नात्यांचा’ असं ब्रीदवाक्य असलेल्या या मराठी वाहिनीला प्रेक्षकांना नेमकं काय पाहायला आवडतंय हे अचूक कळलेलं आहे.
सध्या प्रमुख कलाकारांपेक्षा बाल कलाकार हे जास्त चर्चेचा विषय बनले आहेत. मनोरंजन सृष्टीत मोठ्या कलाकारां इतकाच जास्त भाव बालकलाकारांना मिळतोय. अर्थात, त्यांच्यामध्ये असणाऱ्या कलेची दाद दिलीच पाहिजे. वयाने लहान असूनही कॅमेऱ्यासमोर बिनधास्तपणे वावरण्याची त्यांना अजिबात भीती वाटत नाही, त्यांच्या प्रत्येक कामात आत्मविश्वास जास्त दिसून येतो.
दिग्गज कलाकारांच्या सोबतीने काम करणं असो किंवा सीन्सचे पाठांतर, सीन्सनुसार लागणारे हावभाव सगळं काही अगदी अचूक असतं. बालकलाकारांनी प्रेक्षकांच्या मनात अढळ स्थान निर्माण केले आहे आणि त्यातील एक नाव म्हणजे आरंभी उबाळे. घारे डोळे, गोंडस चेहरा, निरागस हास्य आणि अभिनयाच्या बाबतीत तर कमाल मुलगी अशी आरंभीची ओळख होते. (Latest News Update)
‘सन मराठी’वरील ‘सावली होईन सुखाची’ या मालिकेत बालकलाकार आरंभी उबाळे ही ‘बिट्टी’ची भूमिका साकारत आहे. १४ ऑगस्टपासून ही मालिका प्रेक्षकांच्या भेटीस आली आणि या मालिकेतील आरंभीने साकारलेली ‘बिट्टी’ची भूमिका सर्वांनी पाहिलीच असेल. आरंभीचा गोडवा हा बिट्टीमध्ये उतरला आहे, म्हणजे बिट्टी हे पात्रं प्रेक्षकांच्या मनात हक्काची जागा तयार करणार यात शंका नाही.
आरंभीला तिच्या वयाच्या अडीच वर्षापासून कॅमेरासमोर कसं वावरायचं या विषयी योग्य असे मार्गदर्शन तिच्या आईकडून मिळाले आणि त्याचा फायदा तिला पुढे झाला. आरंभीने जाहिरातीत काम केले आहे. ‘गुम है किसीं के प्यार में’ आणि ‘अनुपमा’ या दोन हिंदी मालिकेत आणि ‘क्षण’ या मराठी शॉर्ट फिल्ममध्ये अभिनय केला आहे.
मराठीमध्ये काम करण्याची तिची इच्छा ‘सावली होईन सुखाची’ या मालिकेच्या निमित्ताने पूर्ण झाली. आरंभीचे कौतुक झालेच पाहिजे हे म्हणण्यामागे कारण की, आरंभी ही ‘वन टेक आर्टिस्ट’ आहे. ‘एकाच टेकमध्ये परफेक्ट शॉट देणारी बालकलाकार’ असे सेटवर अनेकांचे मत आहे. दिवसभर सेटवर असणारी आरंभी अभ्यास देखील मनापासून करते. अभिनय आणि शिक्षण या दोन्ही गोष्टींमधला समतोल आरंभी आणि तिच्या आई-वडीलांनी सांभाळला आहे.
सकाळ+चे सदस्य व्हा
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.