Remo D’Souza Extortion Case: कोरिओग्राफर रेमो डिसूझाला धमकावत ५० लाखांची मागितली खंडणी; गँगस्टर रवी पुजारीला बेड्या ठोकल्या

Remo D’Souza Extortion Case: २०१८ मध्ये बॉलीवूड कोरिओग्राफर रेमो डिसूझा आणि त्याची पत्नी लिझेल डिसूझाकडे खंडणी मागणाऱ्या गँगस्टर रवी पुजारीला अटक करण्यात आली आहे. पुजारी पाच वर्षांपूर्वी सेनेगलमधून हद्दपार झाल्यापासून तुरुंगात होता. त्याला आतापर्यंत या प्रकरणात अटक करण्यात आली नव्हती. पण, आता त्याला या प्रकरणात अटक करण्यात आली आहे.

मुंबई पोलिसांच्या गुन्हे शाखेने त्याला गुरुवारी एस्प्लेनेड न्यायालयात हजर केले आणि २७ जानेवारीपर्यंत पोलिस कोठडी सुनावली. पोलिस सूत्रांनी दिलेल्या माहितीनुसार, या प्रकरणात आधीच आरोप असलेल्या सत्येंद्र त्यागीच्या सांगण्यावरून पुजारीने रेमो डिसूझा आणि त्याच्या कुटुंबाला धमकावले होते.

ऑक्टोबर २०१६ ते फेब्रुवारी २०१८ दरम्यान, त्याने डिसूझा, त्याची पत्नी आणि त्याच्या मॅनेजरला वारंवार फोन करून धमकावले. त्याच्या धमक्यांमध्ये, पुजारीने 'डेथ ऑफ अमर' चित्रपट लवकर प्रदर्शित करण्यासाठी दबाव आणण्याचा प्रयत्न केला आणि प्रकरण मिटवण्यासाठी ५० लाख रुपयांची मागणी केली.

२०१८ चा खटला

२०१८ मध्ये, रेमो डिसूझा आणि सत्येंद्र त्यागी यांनी 'अमर मस्ट डाय' नावाच्या चित्रपटासाठी करार केला होता. नंतर, चित्रपटाच्या हक्कांवरून आणि पैश्यांवरून दोघांमध्ये वाद निर्माण झाला. त्यागीने दावा केला की त्याने चित्रपटात गुंतवणूक केली होती आणि रेमो डिसूझा त्याला ५ लाख रुपये देणार होता. यामुळे त्यागीने त्याचे पैसे वसूल करण्यासाठी रवी पुजारीची मदत मागितली. त्यानंतर, पुजारीने डिसूझा कुटुंब आणि त्याच्या मॅनेजरला ५० लाखांची खंडणी देण्यासाठी धमकावण्याची सुरुवात केली.