Rajpal Yadav: राजपाल यादवच्या वडिलांचे निधन; २ दिवसांपूर्वी अभिनेत्यालाही मिळाली होती जीवे मारण्याची धमकी

Rajpal Yadav: बॉलिवूड अभिनेता राजपाल यादवचे वडील नौरंग यादव यांचे आज दिल्लीत निधन झाले. मागील काही काळापासून त्यांची प्रकृती ठिक नसल्यामुळे त्यांना उपचारांसाठी दिल्लीतील एम्स रुग्णालयात दाखल करण्यात आले. रुग्णालयात उपचारादरम्यान त्यांनी अखेरचा श्वास घेतला.

वडिलांच्या प्रकृती गंभीर असल्याची माहिती मिळाल्यानंतर राजपाल यादव गुरुवारी (२३ जानेवारी) थायलंडहून दिल्लीला परतला. या बातमीनंतर इंडस्ट्रीत शोककळा पसरली आहे.राजपाल यादव हा उत्तर प्रदेशातील शाहजहापूरचा रहिवासी आहे. .राजपाल यादवच्या वडिलांचे अंत्यसंस्कार त्यांच्या मूळ गावी करण्यात येणार असल्याचा अंदाज वर्तवला जात आहे.

दरम्यान, बुधवारी अभिनेत्यासह ४ स्टार्सना जीवे मारण्याच्या धमक्या मिळाल्या. विनोदी कलाकार आणि अभिनेते राजपाल यादव आणि कपिल शर्मा यांना धमकीचा ईमेल पाठवण्यात आला आहे. हा ईमेल पाकिस्तानमधून पाठवण्यात आल्याचा आरोप आहे. या दोन स्टार्स व्यतिरिक्त सुगंधा मिश्रा आणि रेमो डिसूझा यांनाही धमक्या मिळाल्या असून पोलिसांनी तक्रार नोंदवली आहे.

या घटनेनंतर, राजपाल यादवचा एक ऑडिओ सोशल मीडियावर व्हायरल होत आहे, यामध्ये तो, मी अंबोली पोलिस स्टेशन आणि सायबर क्राईम दोघांनाही कळवले आहे. यानंतर मी याबद्दल कोणाशीही बोललो नाही. असे तो म्हणाला. तो पुढे म्हणाला की मी एक अभिनेता आहे आणि मी अभिनय करतो. मी माझ्या कामाद्वारे सर्व वयोगटातील मंडळींचे मनोरंजन मी करतो. या प्रकरणातबद्दल मला कोणतीही माहिती नाही. मला मिळालेली माहिती मी पोलिसांना सांगितली आहे.