Na Dho Mahanor Death: निसर्गाचे सौंदर्य शब्दातून समृद्ध करणारा कवी हरपला; ज्येष्ठ साहित्यिक ना. धों. महानोर यांचे निधन

Na Dho Mahanor Passes Away : ज्येष्ठ साहित्यिक आणि कवी ना. धो. महानोर यांचे निधन झाले. पुण्यातील रुबी हॉल क्लिनिकमध्ये सकाळी साडेआठ वाजता त्यांनी अखेरचा श्वास घेतला.

वयाच्या ८१ व्या वर्षी ना. धों. महानोर यांचे निधन झाले आहे. गेल्या काही दिवसांपासून ते आजारी असून ते व्हेंटीलेटरवर होते. ते किडनीच्या आजाराने त्रस्त होते. उद्या म्हणजे शुक्रवारी पळसखेड येथे त्यांच्या गावी दुपारी ४ वाजता त्यांच्यावर अंत्यसंस्कार करण्यात येणार आहेत.

खासदार सुप्रिया सुळे यांनी ट्वीट करत ना. धों. महानोर यांना श्रद्धांजली वाहिली आहे. सुप्रिया सुळे यांनी ट्वीट करत लिहिले आहे की, ज्येष्ठ कवी ना. धों. महानोर यांचे निधन झाले. ही आम्हा सर्वांसाठी व्यक्तिगत हानी आहे. महानोरांनी खऱ्या अर्थाने मराठी साहित्यात बालकवी आणि बहिणाबाई यांचा समृद्ध वारसा जीवंत ठेवला.

कवितेतून माती, शेती आणि संस्कृतीची नवी ओळख करून दिली. त्यांच्या ‘पानझड’, ‘तिची कहाणी' ‘रानातल्या कवितां' आदी अनेक रचना अजरामर आहेत. त्यांनी यशवंतराव चव्हाण सेंटरचे विश्वस्त म्हणून देखील काम पाहिले. त्यांच्या निधनामुळे साहित्याला मातीशी जोडून ठेवणारा साहित्यिक काळाच्या पडद्याआड गेला. या कठीण प्रसंगी आम्ही सर्वजण महानोर कुटुंबियांसोबत आहोत. भावपूर्ण श्रद्धांजली.