Panchayat Star Cast Fee : सचिवजी की प्रधानजी ? 'पंचायत ३'साठी सर्वाधिक मानधन कोणी घेतले?

सध्या प्रेक्षकांना 'पंचायत ३' वेबसीरीजची कमालीची उत्सुकता लागली आहे. गेल्या काही दिवसांपासून प्रेक्षक या वेबसीरीजची आतुरतेने वाट पाहत आहेत. येत्या २८ मे रोजी ही वेबसीरीज 'अ‍ॅमेझॉन प्राईम व्हिडीओ'वर रिलीज होणार आहे. गेल्या काही दिवसांपूर्वीच या सीरिजचा ट्रेलर सोशल मीडियावर प्रदर्शित झाला असून सोशल मीडियावर चाहत्यांमध्ये या वेबसीरीजची तुफान चर्चा होताना दिसत आहे. या सीरिजमध्ये भूमिका साकारणाऱ्या कलाकारांना किती मानधन मिळालंय, त्याचीही माहिती समोर आली आहे.

टाईम्स नाऊ नवभारतच्या रिपोर्टनुसार, सचिवजी अर्थात अभिनेता जितेंद्र कुमारने या सीझनसाठी सर्वाधिक मानधन घेतले आहे. अभिनेता जितेंद्र कुमारला या सीरीजच्या एका एपिसोडसाठी ७० हजार रुपये मानधन मिळालं आहे. 'पंचायत'च्या तिसऱ्या सीझनमध्ये सर्वाधिक मानधन घेणारा कलाकार जितेंद्र कुमारच आहे

प्रधानजी बृजभूषण दुबे यांची भूमिका साकारणारे अभिनेते रघुबीर यादव यांना या सीरीजच्या एका एपिसोडसाठी ४० हजार रुपये मानधन मिळालं आहे. तर अभिनेत्री नीना गुप्ता यांनी या सीरीजमध्ये प्रधानजीच्या पत्नीची भूमिका साकारली आहे. प्रधानजीच्या पत्नीचे नाव मंजू देवी असं असून या एका एपिसोडसाठी अभिनेत्री नीना गुप्ता यांनी ५० हजार रुपये इतके मानधन मिळाले आहे.

फुलेरा ग्राम पंचायतचे कार्यालय सहाय्यक विकासचे पात्र साकारणाऱ्या अभिनेता चंदन रॉयलाही एका एपिसोडसाठी २० हजार रुपये मानधन मिळालं आहे. तर उप-प्रधान प्रल्हाद पांडेची भूमिका साकारणाऱ्या अभिनेता फैजल मलिकलाही एका एपिसोडसाठी २० हजार रुपये मानधन मिळालं आहे.