'तू फक्त हो म्हण'... मोनालिसा कुणाला बोलतेय? लवकरच येणार नवाकोरा चित्रपट

मुंबई: मराठी चित्रपटसृष्टीला अनेक चित्रपट दिल्यानंतर मोनालिसा बागल एक नवी कलाकृती घेऊन येत आहे. प्रत्येक वेळी वेगवेगळी कलाकृती सादर करणारी मोनालिसा एक नवा चित्रपट प्रेक्षकांच्या भेटीला घेऊन येत आहे. नव्या चित्रपटात ती कोणाच्या प्रेमात पडली आहे. हे आपल्याला चित्रपट पाहिल्यावरच कळेल. 'तू फक्त हो म्हण' असे ती सांगत आहे. ती नेमकी कोणाच्या प्रेमात पडली आहे? ती कोणाला 'हो' म्हणायला सांगते हे जाणून घेण्याची उत्सुकता प्रेक्षकांना लागलीच आहे. तिचा आगामी 'तू फक्त हो म्हण' चित्रपट एन एच स्टुडिओ प्रस्तूत येत्या १४ ऑक्टोबरला प्रदर्शित होणार आहे.

संगीतातून उलगडणारी प्रेमकथा असलेल्या 'तू फक्त हो म्हण' या चित्रपटाचे दिग्दर्शन डॉ. गणेशकुमार पाटील आणि भास्कर डाबेराव यांनी केले आहे. चित्रपटाचे निर्मीते किरण बळीराम चव्हाण आणि डॉ. गणेशकुमार पाटील आहेत. नरेंद्र हिरावत आणि श्रेयांश हिरावत हे चित्रपटाचे सादरकर्ते आहेत.

आपल्या भूमिकेबद्दल मोनालिसा सांगते, संगीतमय प्रेमकथा असल्याने मला हा चित्रपट करायचा होता. ही अशा प्रेमाची कथा आहे जी कदाचित आपल्या शेजारी देखील असू शकते. प्रेम हे असतंच पण त्या प्रेमाला जिंकत आपण ते कसं निभावतो? याची कथा यात पहायला मिळणार आहे. प्रेमाकडे बघण्याचा समाजाचा दृष्टिकोनही 'तू फक्त हो म्हण' या चित्रपटात मांडण्यात आला आहे.

अभिनेत्री मोनालिसा बागलसोबत अभिनेता निखील वैरागर या चित्रपटात मुख्य भूमिकेत दिसणार आहे. या दोघांच्या जोडीला गणेश देशमुख, तुकाराम बीडकर, पुष्पा चौधरी, सविता हांडे, डॉ.गणेशकुमार पाटील, झोया खान आदि कलाकारांच्या भूमिका आहेत. तर मानसी नाईक ही चित्रपटात पाहुण्या भूमिकेत दिसणार आहे.

'तू फक्त हो म्हण' या चित्रपटाची कथा भास्कर डाबेराव तर पटकथा संवाद सचिन जाधव यांनी लिहिली आहे. तर चित्रपटातील गाण्यांना आनंद शिंदे, अवधूत गुप्ते, आर्या आंबेकर, जय बोरा, पूजा पाटील यांचा स्वरसाज लाभला आहे. 'तू फक्त हो म्हण' हा चित्रपट १४ ऑक्टोबरला प्रदर्शित होणार आहे.