'मी पुन्हा येईन'... सत्तेचा घोडेबाजार दाखवणाऱ्या वेब सीरीजचा टीझर पाहा

मुंबई - महाराष्ट्राच्या राजकारणानं गेल्या काही दिवसांत मोठे भूकंप पाहिले आहेत. शेवटपर्यंत कुणालाच माहिती नव्हतं की काय होईल, एखाद्या सस्पेंस चित्रपटापेक्षा काही जबरदस्त असा क्लायमॅक्स सगळ्यांनी पाहिला. राजकीय घडामोडींच्या या पार्श्वभूमीवर 'मी पुन्हा येईन' नावाची वेबसीरिज तुमच्या भेटीला येणार आहे. अरविंद जगताप (Arvind Jagtap) यांचं लिखाण आणि दिग्दर्शन असलेल्या या वेब सीरिजची निर्मिती प्लॅनेट मराठी, गौतम कोळी आणि जेम क्रिएशन्सने केली आहे.

नुकतचं या वेबसिरीजचा (Web Series) टीझर प्रदर्शित करण्यात आला आहे. अभिनेता भारत गणेशपुरे सिरीजमध्ये प्रमुख भूमिकेत झळकणार आहे. भारत गणेशपुरेला (Bharat Ganeshpure) 'मी पुन्हा येईन', असं म्हणताना पाहून चाहत्यांमध्ये मोठा उत्साह पाहायला मिळत आहे. (Latest Marathi Web Series)

दोन पक्षाचे नेते सत्तेसाठी आमदारांची कशी पळवापळवी आणि फोडाफोडी करत आहेत हे या वेब सीरिजच्या टीझरमध्ये पाहायला मिळत आहे. एवढंच नाही तर शासकीय यंत्रणांचाही कसा वापर केला जातो आणि यात अधिकारीवर्गही आपली पोळी कशी भाजून घेतात, हे पहायला मिळत आहे.

या वेब सीरिजमध्ये उपेंद्र लिमये, भारत गणेशपुरे,सयाजी शिंदे, सिद्धार्थ जाधव, प्रभाकर मोरे, अमित तडवळकर, राजेश दुर्गे, राजेंद्र गुप्ता, रमेश वाणी, संजय कुलकर्णी, दिप्ती क्षीरसागर रुचिका जाधव आणि सीमा कुलकर्णी हे झळकणार आहेत. (Latest Marathi News Update)