Arun Kadam Daughter News: ‘महाराष्ट्राची हास्यजत्रा’ फेम अरुण कदम यांच्या घरी तान्हुल्याचे आगमन, लेकीने दिली गोड बातमी...

Arun Kadam Become Grand Father: ‘महाराष्ट्राची हास्यजत्रा’ फेम अरुण कदम यांच्या जीवनामध्ये एका गोष्टीमुळे आनंद द्विगुणीत झाला आहे. कायमच प्रेक्षकांना लोटपोट हसवणारे अरुण कदम यांची मुलगी सुकन्या हिने चाहत्यांना गेल्या काही दिवसांपूर्वी गोड बातमी दिली होती. नुकतंच तिने बाळाला जन्म दिला असून अरुण कदम यांनी चाहत्यांसोबत ही गोड बातमी शेअर केली आहे.

गेल्या काही दिवसांपूर्वी सुकन्या आणि तिच्या पतीने अगदी मराठमोळ्या पद्धतीतील कपडे परिधान करत बेबी बंप फोटोशूट केलं होतं. आपल्या लेकीच्या डोहाळे जेवनाचे अनेक फोटो आणि व्हिडीओ अरुण कदम यांनी त्यांच्या सोशल मीडिया अकाऊंटवर शेअर केली होते. मध्यंतरी सुकन्या, तिचे पती आणि अरूण कदम यांनी खास पारंपारिक लूक करत मुंबईच्या मरिन ड्राईव्ह परिसरात खास फोटोशूट केलं होतं. त्यांचं हे फोटोशूट सोशल मीडियावर कमालीचे व्हायरल झाले होते.

अरुण कदम यांची मुलगी सुकन्याने २०२१मध्ये सागर पोवाळेसोबत लग्नगाठ बांधली होती. सुकन्या पेशाने कमर्शिअल आर्टिस्ट आणि ग्राफिक डिझायनर असून ती भरतनाट्यम देखील शिकली आहे. अनेकदा सुकन्याने तिच्या वडिलांसोबत धम्माल मस्ती करतानाचे रील्स शेअर केले होते.

अरुण कदम यांच्या वर्कफ्रंटबद्दल बोलायचे तर, त्यांनी आपल्या सिनेकारकिर्दित अनेक कॉमेडी चित्रपटांमध्ये प्रमुख भूमिका साकारल्या आहेत. ‘महाराष्ट्राची हास्यजत्रा’ या कॉमेडी शोमुळे त्यांना विशेष ओळख मिळाली असून त्यांचे अनेक पात्र कायमच प्रेक्षकांना पोट धरून हसायला भाग पाडतात.