Rajnikanth News : रजनीकांत वर्तमानपत्र उचलायला वाकले अन् तोंडावर आपटले; चाहत्यांची चिंता वाढली

सुपरस्टार अभिनेता रजनीकांत यांच्याशी संबंधित एक व्हिडिओ सध्या सोशल मीडियावर वेगाने व्हायरल होत असून, त्यांच्या चाहत्यांमध्ये चिंतेचे वातावरण निर्माण झाले आहे. या व्हिडिओमध्ये रजनीकांत यांच्यासारखा दिसणारा एक व्यक्ती चेन्नईतील त्यांच्या घराच्या लॉनमध्ये सकाळी फिरताना दिसतो. व्हिडिओच्या सुरुवातीला तो एक साध्या पद्धतीचं टी-शर्ट परिधान करून घराबाहेर येतो आणि वर्तमानपत्र उचलण्यासाठी वाकतो, तेव्हा पाय घसरून तो जोरात जमिनीवर पडतो. मात्र, काही क्षणातच तो स्वतःला सावरतो, उठतो आणि कोणत्याही मदतीशिवाय घराकडे परततो.

हा व्हिडिओ समोर येताच सोशल मीडियावर प्रचंड प्रतिक्रिया उमटल्या आहेत. काही चाहते त्यांच्या आरोग्याबाबत चिंतेत असल्याचं सांगत आहेत, तर बरेचसे लोक याला वैयक्तिक गोपनीयतेवर झालेला आघात मानत आहेत. अनेकांनी व्हिडिओ रेकॉर्ड करणाऱ्या व्यक्तीवर नाराजी व्यक्त केली आहे. एका यूजरने म्हटलं, “हा इतका खासगी क्षण कसा काय कॅमेरात कैद झाला? ही गोष्ट काळजीचा विषय आहे.” दुसऱ्याने लिहिलं, “एखाद्याचा कमकुवत क्षण व्हायरल करणे ही अत्यंत लाजिरवाणी गोष्ट आहे. प्रत्येकाला गोपनीयतेचा हक्क आहे.”

सध्या रजनीकांत ‘कुली’ या चित्रपटाच्या तयारीत व्यस्त आहेत. या चित्रपटाचं दिग्दर्शन लोकेश कनागराज करत असून श्रुती हासन, नागार्जुन, उपेंद्र, सौबिन शाहीर, सत्यराज, रेबा मोनिका जॉन, ज्युनियर एमजीआर यांसारखे कलाकारही प्रमुख भूमिकांमध्ये झळकणार आहेत. याशिवाय रजनीकांत यांच्या ‘जेलर २’ चित्रपटाचीही जोरदार चर्चा सुरू आहे.

हा २०२३ मधील ब्लॉकबस्टर ‘जेलर’चा सिक्वेल असून त्याचे दिग्दर्शन नेल्सन दिलीपकुमार करणार आहेत. हा चित्रपट २०२५ च्या अखेरीस किंवा २०२६ च्या सुरुवातीस प्रदर्शित होण्याची शक्यता आहे. दरम्यान, व्हिडिओतील व्यक्ती खरंच अभिनेता रजनीकांत आहेत की नाही, याबाबत अधिकृत माहिती समोर आलेली नसली तरी व्हिडिओतील स्थिती आणि चाहते व्यक्त करत असलेली भावना निश्चितच सुपरस्टारच्या कळकळीच्या चाहत्यांचा ध्यास अधोरेखित करते.