Ulhasnagar Crime: गुटखा न दिल्याने वाद, तरुणावर जीवघेणा हल्ला, लोखंडी रॉड, दांडक्याने बेदम मारहाण; उल्हासनगरमधील धक्कादायक घटना!

उल्हासनगर, ता. २४ जून २०२३

क्षुल्लक कारणावरुन २१ वर्षीय तरुणावर जीवघेणा हल्ला झाल्याची घटना उल्हासनगर शहरात घडली आहे. १० ते १५ जणांच्या टोळीने हातात चाकू, लोखंडी रॉड आणि लाकडी दांडक्याने जीवघेणा हल्ला केला. ही संपूर्ण घटना मोबाईल कॅमेऱ्यात कैद झाली असून याप्रकरणी पाच जणांना अटक करण्यात आली आहे.

याबाबत सविस्तर माहिती अशी की, अनिल कोरी हा उल्हासनगरच्या छत्रपती शिवाजी महाराज चौकात शनिवारी रात्री चहा प्यायला गेला होता. त्याठिकाणी आरोपी अवि याने अनिलकडे गुटखा मागितला. अनिलने दिला नाही त्यावरून दोघांमध्ये वादविवाद होऊन शिवीगाळ झाली. अनिल हा कॅम्प नंबर 3 च्या खेती एरिया परिसरात घरी परतत असताना अवि आणि त्याच्या साथीदारांनी अनिलला रस्त्यात गाठून जीवघेणा हल्ला केला.

10 ते 15 जणांच्या टोळीने हातात चाकू, लोखंडी रॉड आणि लाकडी दांडक्याने अनिल कोरीला जबर मारहाण केली. या मारहाणीमध्ये अनिल कोरी हा गंभीर जखमी झाला असून त्याच्यावर मध्यवर्ती रुग्णालयात उपचार सुरू आहेत.

याबाबतची माहिती मिळताच मध्यवर्ती पोलिसांनी घटनास्थळी धाव घेतली. याप्रकरणी आरोपी अवी, संतोष, अर्जुन विटेकर, भोलू गुप्ता, साहिल गागट, अमोल सावंत, आयुष राय ,पवन छम्मा यांना अटक केली असून उर्वरित आरोपींचा शोध पोलीस घेत आहेत.