Loksabha Election 2024: खळबळजनक घटना! मतदान केंद्रात आढळला 'CRPF' जवानाचा मृतदेह

लोकसभा निवडणुकांच्या रणधुमाळीला सुरूवात झाली आहे. आज पहिल्या टप्प्यातील १९ राज्ये आणि २ केंद्रशासित प्रदेशांमध्ये मतदान होणार आहे. अशातच पश्चिम बंगालमधून एक मोठी घटना समोर आली असून मतदान केंद्रामध्ये सीआरपीएफ जवानाचा मृतदेह आढळल्याने खळबळ उडाली आहे.

याबाबत सविस्तर माहिती अशी की, पश्चिम बंगालमधील माथाभंगा येथे निवडणूक ड्युटीवर असलेल्या सीआरपीएफ जवानाचा मृत्यू झाल्याची घटना समोर आली आहे. सीआरपीएफ जवान हा बाथरूममध्ये पडला होता, त्यामुळे त्याच्या डोक्याला दुखापत झाली होती. त्यानंतर त्याला रुग्णालयात नेण्यात आले, तेथे त्याचा मृत्यू झाला.

ही घटना काल रात्री घडल्याचे सांगण्यात येत आहे. माथाभंगा येथील मतदान केंद्राच्या बाथरूममध्ये हा सीआरपीएफ जवान बेशुद्धावस्थेत आढळून आला. लोकांनी पाहिल्यावर शिपायाला तातडीने रुग्णालयात नेण्यात आले, तेथे डॉक्टरांनी त्याला मृत घोषित केले. या जवानाच्या डोक्याला दुखापत झाल्याचे रुग्णालयातील सूत्रांचे म्हणणे आहे.

दरम्यान, लोकसभा निवडणुकीच्या पहिल्या टप्प्यातील मतदान आज (शुक्रवारी) होत आहे. पहिल्या टप्प्यात 21 राज्ये आणि केंद्रशासित प्रदेशातील 102 जागांवर मतदान होत आहे. पहिल्या टप्प्यात पश्चिम बंगालमधील कूचबिहार, अलीपुरद्वार आणि जलपाईगुडी या तीन जागांवरही मतदान होत आहे.