Akola Crime News : अकोल्यात सिनेस्टाईल थरार, डोळ्यात मिरची पूड टाकून पेट्रोल पंप चालकाचे लाखो रुपये लुटले

अक्षय गवळी, साम टीव्ही अकोला

डोळ्यात मिरची पावडर फेकत चाकूच्या धाकावर एका पेट्रोल पंप व्यावसायिकाला लुटल्याचा धक्कादायक प्रकार अकोल्यात समोर आलाय. या व्यावसायिकाकडून 3 लाखांची रोख दरोडेखोरांनी लंपास केली. ही घटना शुक्रवारी रात्री १० वाजेच्या सुमारास जिल्ह्यातील मूर्तीजापुर तालुक्यातल्या राष्ट्रीय महामार्गावर घडली. याप्रकरणी पेट्रोल पंप व्यावसायिकाच्या तक्रारीवरून मूर्तिजापूर पोलिसांनी 3 अज्ञातांविरोधात गुन्हा दाखल केला आहे.

गेल्या काही महिन्यांपासून अकोला जिल्ह्यात भररस्त्यात अपहरणाच्या आणि चोरीच्या घटना वाढल्या आहेत. त्यामुळे नागरिकांमध्ये भीतीचे वातावरण निर्माण झाले आहे. मूर्तीजापूर पोलिसांनी दिलेल्या माहितीनुसार दिनेश बूब असे पेट्रोल पंप व्यावसायिकाचे नाव आहे. ते नेहमीप्रमाणे आपलं काम आटोपल्यानंतर चारचाकी वाहनाने पेट्रोल पंपावरून घराकडे निघाले होते.

वाटेतच त्यांना एका दुचाकीस्वाराने हात दिला आणि त्यांची कार थांबवली. त्यानंतर त्याच्या इतर दोन साथीदारांनी असे एकत्रित तिघांनी त्यांच्या वाहनांवर हल्ला चढविला, इतकंच नव्हे तर दिनेश बुब यांच्या डोळ्यात मिरची पूड टाकत त्यांना लाठीने मारहाण केली. त्यानंतर वाहनात ठेवलेली तब्बल अडीच लाखापेक्षा जास्त रोख दरोडेखोरांनी सोबत घेत घटनास्थळावरुन पळ काढला.

स्थानिकांनी या घटनेची माहिती तातडीनं मूर्तीजापूर शहर पोलिसांना दिली. घटनेची माहिती मिळताच शहर पोलीस स्टेशनचे पोलीस निरीक्षक भाऊराव घुगे, मूर्तीजापुर ग्रामीण पोलीस स्टेशनचे पोलीस निरीक्षक कैलास भगत याच्यासह वरिष्ठ पोलीस अधिकारी आणि अकोला पोलिसांच्या स्थानिक गुन्हे शाखेचे पथक घटनास्थळी दाखल झालं.

दरम्यान, या घटनेनंतर भयभीत झालेल्या पेट्रोल पंप व्यावसायिक दिनेश बूब यांना पोलिसांनी रुग्णालयात उपचारासाठी दाखल केलं. सद्यस्थितीत त्यांच्यावर उपचार सुरू आहे. दरोडेखोर अमरावतीच्या दिशेने पळाले असल्याचं पोलिसांना समजलंय. त्या दिशेने पोलिस तपास करीत आहे. परिसरातील तसेच रस्त्यावरील हॉटेलच्या सीसीटीव्ही कॅमेऱ्याची तपासणी केली जात आहे.