Thane Crime: ठाण्यात २५ वर्षीय तरुणाची हत्या, चौघांनी रस्त्यात गाठत जागीच संपवलं

विकास काटे, ठाणे

ठाण्यामध्ये २५ वर्षीय तरुणाची निर्घृण हत्या करण्यात आल्याची धक्कादायक घटना समोर आली आहे. ठाण्यातल्या लक्ष्मीनगरमध्ये ही घटना घडली. पूर्ववैमनस्यातून चौघांनी या तरुणाला रस्त्यात गाठून बेदम मारहाण केली. या मारहाणीत या तरुणाचा जागीच मृत्यू झाला. दर्शन शिंदे असं हत्या करण्यात आलेल्या तरुणाचे नाव आहे. घटनेची माहिती मिळताच वर्तकनगर पोलिसांनी घटनास्थळी धाव घेतली.

मिळालेल्या माहितीनुसार, दर्शन शिंदे (२५ वर्षे) असं हत्या झालेल्या तरुणाचे नाव आहे. दर्शन ठाण्यातल्या सिद्धेश्वर तलाव परिसरात आईसोबत राहत होता. आधी तो लक्ष्मीनगरमध्ये राहत होता. पण त्याठिकाणी पुनर्वसनाचे काम सुरू असल्यामुळे तो सिद्धेश्वर तलावाजवळ राहण्यासाठी गेला होता.

आज संध्याकाळी दर्शन लक्ष्मीनगर येथे फेरफटका मारण्यासाठी गेला होता. याठिकाणी जुन्या रागातून चौघांनी त्याला बेदम मारहाण केली. हे सर्व तरुण राजवाडा येथे राहतात. या चौघांनी दर्शनला मरेपर्यंत मारहाण केली. या मारहाणीत गंभीर जखमी झालेल्या दर्शनचा जागीच मृत्यू झाला.

घटनेची माहिती मिळताच वर्तकनगर पोलिसांनी घटनास्थळी धाव घेतली. या प्रकरणी पोलिसांनी एकाला ताब्यात घेतले आहे. दर्शनचा मतदेह पोलिसांनी ताब्यात घेतला असून ठाण्याच्या जिल्हा सामान्य रुग्णालयात शवविच्छेदनासाठी पाठवण्यात आला आहे. वर्तकनगर पोलिस या हत्या प्रकरणाचा तपास करत आहेत. या घटनेमुळे लक्ष्मीनगरमध्ये खळबळ उडाली आहे.