Battery Saving Tips : फोनची बॅटरी लगेच संपतेय? 'या' ५ सेटिंग लगेच बदला, मोबाईल चालेल अधिक काळ

स्मार्टफोन युजर्ससाठी सर्वात मोठी समस्या म्हणजे बॅटरी लवकर डिस्चार्ज होणे. पूर्वी कीपॅड फोन एका चार्जवर दोन-तीन दिवस सहज चालायचे. पण आजचे अँड्रॉइड फोन एक दिवसही टिकत नाहीत. सतत चार्जिंगची गरज भासल्याने यूजर्स त्रस्त होतात. मात्र, काही सोप्या टिप्स आणि सेटिंग्ज बदल करून तुम्ही तुमच्या मोबाईलची बॅटरी जास्त काळ टिकवू शकता. या उपायांचा अवलंब केल्यास बॅटरीचा वापर कमी होईल आणि चार्जिंगवर अवलंबित्व घटेल. चला जाणून घेऊया स्मार्टफोनची बॅटरी लाइफ वाढवण्याच्या खास टिप्स कोणत्या आहेत.

ऑलवेज ऑन डिस्प्ले

फोन लॉक असताना स्क्रीनवर वेळ किंवा नोटिफिकेशन्स दिसत असल्यास ‘ऑलवेज ऑन डिस्प्ले’ फीचर सुरू असते. हे आकर्षक असले तरी बॅटरी लवकर संपवते. कंपन्यांच्या माहितीनुसार, दर तासाला साधारण १-२% बॅटरी वापरले जाते, मात्र प्रत्यक्षात जास्तही होऊ शकते. त्यामुळे बॅटरी वाचवण्यासाठी हे फीचर बंद करणे महत्त्वाचे आहे. यासाठी सेटिंग्जमध्ये ‘लॉक स्क्रीन’ किंवा ‘डिस्प्ले’ विभागात जाऊन ‘ऑलवेज-ऑन डिस्प्ले’ ऑप्शन बंद करा.

स्क्रीन ब्राइटनेस आणि स्लीप टाइम

बॅटरी जास्त काळ टिकवण्यासाठी स्क्रीनची ब्राइटनेस कमी ठेवणे हा सर्वात सोपा आणि प्रभावी उपाय आहे. यासोबतच फोनचा ‘स्लीप टाइम’ कमी करणेही महत्त्वाचे आहे. अनेकजण तो एक मिनिट किंवा त्याहून अधिक ठेवतात, ज्यामुळे फोन वापरात नसतानाही स्क्रीन बराच वेळ चालू राहते आणि बॅटरी अनावश्यक खर्च होते.

बॅटरी सेव्हर मोड

स्मार्टफोनमध्ये उपलब्ध असलेले ‘बॅटरी सेव्हर मोड’ फीचर बॅटरीचे आयुष्य वाढवण्यासाठी अत्यंत उपयुक्त आहे. हा मोड सुरू ठेवल्यास बॅकग्राउंडमध्ये चालणाऱ्या अॅप्सची क्रिया कमी होते आणि अनावश्यक व्हिज्युअल इफेक्ट्स थांबवले जातात. काही मॉडेल्समध्ये ‘एक्सट्रीम बॅटरी सेव्हर’ हा अतिरिक्त पर्यायही मिळतो, ज्यामुळे बॅटरी आणखी जास्त काळ टिकते.

डार्क मोड

फोनची बॅटरी जास्त काळ टिकवण्यासाठी डार्क मोड वापरणे फायदेशीर ठरते. हा मोड सुरू ठेवल्यास स्क्रीनवरील पिक्सेल कमी प्रकाश वापरतात आणि त्यामुळे बॅटरीचा खर्च कमी होतो. डार्क मोड सुरू करण्यासाठी सेटिंग्जमधील ‘डिस्प्ले’ पर्याय उघडा आणि दिलेल्या लाईट व डार्क थीमपैकी डार्क मोड निवडा.

अ‍ॅडॉप्टिव्ह बॅटरी

अँड्रॉइड फोनमध्ये उपलब्ध असलेले ‘अ‍ॅडॉप्टिव्ह बॅटरी’ फीचर बॅटरीचा वापर कमी करण्यासाठी उपयुक्त ठरते. हलकी कामे जसे की ईमेल तपासताना हे फीचर फोनचा स्पीड कमी करून उर्जा वाचवते. हे सक्रिय करण्यासाठी सेटिंग्जमधील ‘बॅटरी’ विभागात जा, ‘अ‍ॅडॉप्टिव्ह प्रेफरन्सेस’ उघडा आणि ‘अ‍ॅडॉप्टिव्ह बॅटरी’ पर्याय चालू करा.