MHADA Lottery : आनंदाची बातमी! ५,२८५ घरांबाबत म्हाडाचा मोठा निर्णय, वाचा सविस्तर

Mhada News : स्वत:चे हक्काचे घर घेण्याचे प्रत्येकाचे स्वप्न असते. जर तुम्हीही असाच विचार करत असाल, तर तुमच्यासाठी अत्यंत आनंदाची बातमी आहे. म्हाडा कोकण गृहनिर्माण वे क्षेत्रविकास मंडळाने जाहीर केलेल्या सदनिका आणि भूखंड विक्री सोडतीसाठी अर्ज सादर करण्याची मुदत वाढवण्यात आल्याची माहिती समोर आली आहे.

मिळालेल्या माहितीनुसार, म्हाडा कोकण गृहनिर्माण आणि क्षेत्रविकास मंडळाने जाहीर केलेल्या ५,२८५ सदनिका आणि ७७ भूखंड विक्री सोडतीसाठी अर्ज सादर करण्याची मुदत वाढवून १२ सप्टेंबर २०२५ करण्यात आली आहे. सोडतीचा संगणकीय कार्यक्रम ९ ऑक्टोबर २०२५ रोजी ठाणे येथील डॉ. काशीनाथ घाणेकर नाट्यगृहात पार पडणार आहे. २८ ऑगस्टपर्यंत एकूण १,४९,९४८ अर्ज नोंदणी झाले असून त्यापैकी १,१६,५८३ अर्ज अनामत रकमेसह प्राप्त झाले आहेत.

नवीन वेळापत्रकानुसार :

१२ सप्टेंबर रात्री ११:५९ पर्यंत अर्ज सादर करता येणार आहे. १५ सप्टेंबरपर्यंत RTGS/NEFT द्वारे भरणा करता येणार आहे. त्यानंतर २५ सप्टेंबर रोजी प्रारूप यादी जाहीर केली जाईल. २४ सप्टेंबरपर्यंत हरकती नोंदविता येणार आहेत. पुढे ७ ऑक्टोबर रोजी अंतिम यादी प्रसिद्ध केली जाईल. ९ ऑक्टोबरला सोडतीचा निकाल जाहीर होईल.

या सोडतीत सर्वसमावेशक योजना, एकात्मिक शहर गृहनिर्माण योजना, परवडणाऱ्या घरांची योजना तसेच भूखंड विक्री या पाच घटकांमध्ये घरे उपलब्ध होणार आहेत. सदनिका-भूखंड विक्री सोडतीसाठीचा अर्ज सादर करमण्याची मुदत वाढवल्याने इच्छुकांना अर्ज करण्यासाठी संधी मिळणार आहे.