Jio-Airtel-Vi यूजर्ससाठी खास टिप्स! महागलेले रिचार्ज प्लॅन टाळा, 'या' सोप्या ट्रिक्सचा वापर करा अन् मोबाईल डेटा वाचवा

गेल्या वर्षी जुलै महिन्यात एअरटेल, जिओ आणि व्हीआय या टेलिकॉम कंपन्यांनी त्यांच्या रिचार्ज प्लॅनचे दर वाढवले. यानंतर ग्राहकांना इंटरनेट डेटा पॅकसाठी पूर्वीपेक्षा जास्त खर्च करावा लागत आहे. अनेक ऑपरेटर्सनी १ जीबी दैनिक डेटा असलेले प्लॅन बंद केले आहेत.

सध्या १.५ जीबी डेटा असलेल्या प्लॅनसाठीही ग्राहकांना महिन्याला ३०० रुपयांपेक्षा जास्त खर्च करावा लागतो. त्यामुळे २ जीबी दैनिक डेटा घेणारे अनेक यूजर्स खर्च वाचवण्यासाठी १.५ जीबी प्लॅनची निवड करत आहेत. वाढत्या दरांमुळे ग्राहकांमध्ये हा पर्याय लोकप्रिय ठरत आहे.

दररोजचा डेटा मर्यादित असल्याने तो पूर्ण दिवस पुरावा यासाठी ग्राहकांनी काही उपाययोजना करणं गरजेचं झालं आहे. मर्यादित डेटा पूर्ण दिवस टिकावा यासाठी काही सोप्या सवयी महत्त्वाच्या ठरतात. काही सोप्या ट्रिक्स खालीलप्रमाणे आहेत:

1. मोबाईलमधील अ‍ॅप्स आणि ऑपरेटिंग सिस्टममधील ऑटो अपडेट्स बंद करून केवळ वाय-फायद्वारे अपडेट्स डाऊनलोड केल्यास डेटा वाचवता येतो.

2. त्याचप्रमाणे, व्हॉट्सअॅपमध्ये फोटो आणि व्हिडिओंचे ऑटो डाउनलोडिंग बंद केल्याने अनावश्यक डेटा वापर टाळता येतो.

3. फोनच्या सेटिंग्जमधील डेटा सेव्हर मोड वापरल्यास बॅकग्राऊंडमध्ये डेटा खर्च होणार नाही आणि तो फक्त गरजेच्या वेळीच वापरला जाईल.

4. याशिवाय, व्हिडिओ पाहताना एचडीऐवजी सामान्य गुणवत्तेत स्ट्रीमिंग केल्यास डेटा दीर्घकाळ टिकतो. या छोट्या सवयी अंगीकारल्यास यूजर्स दैनंदिन इंटरनेट खर्चावर नियंत्रण ठेवू शकतात.