Income Tax Return: सोशल मीडियावर कमाई करणाऱ्यांना किती द्यावा लागतो टॅक्स? कोणता ITR फॉर्म भरावा लागतो?

भारतात सोशल मीडिया कंटेंट क्रिएटर्स आणि इन्फ्लुएंसरची संख्या वाढलीय. आयकर विभागाच्या मते, गेल्या दोन वर्षांत वार्षिक २० लाख रुपयांपेक्षा जास्त कमाई करणाऱ्या सोशल मीडिया इन्फ्लुएंसरची संख्या खूप वाढलीय. काही इन्फ्लुएंसरची कमाई वर्षाला २ ते ५ कोटीच्या घरात आहे. सोशल मीडियावर इतकी मोठी कमाई करणाऱ्यांना किती कर भरावा लागतो. त्यांना कोणता आयटीआर फॉर्म लागतो? असे प्रश्न अनेकांना पडली आहेत.

टॅक्ससाठी बदलण्यात आले नियम

आयकर विभागाने आयटीआर-३ आणि आयटीआर-४ फॉर्ममध्ये मोठा बदल केलाय. त्यामध्ये पाच व्यावसायिक श्रेणी जोडल्या आहेत. यामध्ये यूट्यूब आणि इतर सोशल मीडिया, सट्टेबाजी व्यवसाय, कमिशन एजंट आणि फ्युचर्स अँड ऑप्शन्स ट्रेडर्समधून मिळणाऱ्या उत्पन्नाचा समावेश करण्यात आलाय. दरम्यान आतापर्यंत सोशल मीडिया इन्फ्लुएंसर किंवा शेअर बाजारातील व्यावसायिक आधी आयकर रिटर्न भरण्यासाठी इतर कॅटेगरी निवडत होते. त्यामुळे कर भरणारा व्यक्ती कोणत्या पेशेत व्यवसाय करतोय हे ओळखणं कठीण होते.आता त्यांना एक खास कोड देण्यात आलाय. त्यामुळे त्याची ओळख लगेच होईल.

यूट्यूब आणि इतर सोशल मीडियावरून कमाई करणाऱ्यांना आयकर विभागाने १६०२१ हा कोड दिलाय. प्रमोशन, डिजिटल कंटेंट किंवा जाहिरातींमधून कमाई करणाऱ्यांना हा कोड देण्यात आलाय. ज्याचा आयटीआर-३ आणि आयटीआर-४ दोन्ही फॉर्ममध्ये समाविष्ट करण्यात आली आहेत. सोशल मीडियावरून कमाई करणाऱ्यांना त्यांच्या उत्पन्नाच्या पातळीनुसार आणि अंदाजे करानुसार आयटीआर ३ किंवा आयटीआर ४ दाखल करावे लागणार आहे.

जर समजा एखाद्या इन्फ्लुएंसरने अनुमानित कर आकारणी अंतर्गत कलम ४४ADA चा पर्याय निवडला तर त्याला ITR-४ दाखल करावे लागेल. तर शेअर बाजारातून कमाई करणाऱ्या फ्युचर्स ऑप्शन्स (F&O) विभागातील व्यापाऱ्यांसाठी २१०१० हा नवीन कोड देण्यात आलाय. हा कोड त्यांच्या व्यापारातून होणाऱ्या कमाईची अचूक माहिती सुनिश्चित करेल. ट्रेडर्ससाटी आयटीआर-३ भरून त्यांना पूर्ण उत्पन्न आणि नुकसानाची माहिती द्यावी लागेल.