संजय राठोड

Yavatmal News:

यवतमाळमधून एक धक्कादायक घटना समोर आलीये. रस्त्यावरील कार बाजूला घेण्यावरून वाद घालत एका व्यक्तीवर जोरदार हल्ला करण्यात आला आहे. शुल्लक कारणावरून दोन तरुणांनी कारमध्ये बसलेल्या व्यक्तीच्या डोक्यावर बेसबॉल स्टिकने हल्ला केलाय.

घटनेबाबत अधिक माहिती अशी की, यवतमाळ शहरातील वीर सावरकर चौकात ही घटना घडली आहे. सदर घटना सीसीटीव्ही कॅमेऱ्यात कैद झाली आहे.राहुल कराळे असे जखमी व्यक्तीचे नाव असून ते डाक सेवक असल्याची माहिती मिळाली आहे.

सीसीटीव्हीमध्ये दिसत आहे की, रस्त्याने जात असलेल्या एका तरुणाच्या चारचाकी वाहनाला दुसऱ्या चारचाकी वाहन चालकाने अडवलं. त्यानंतर कार बाजूला घेण्यावरून त्यांच्यात वाद झाला. वादामध्ये राग अनावर झाल्याने दुसऱ्या कारमधील तरुणाने आपल्या कारच्या डिक्कीतून एक लाकडी दांडका बाहेर काढला.

मागचा पुढचा कसलाही विचार न करता त्याने हा लाकडी दांडका दुसऱ्या वाहनातील व्यक्तीच्या डोक्यावर मारला. जोरदार घाव केल्याने तो जागेवरच कळवळला. जखमी व्यक्तीला तेथेच सोडून या व्यक्तींनी तेथून पळ काढला. जखमी व्यक्तीवर नागपूरमधील रुग्णालयात उपचार सुरू आहेत.