जंगलांचे रूपांतर शहरात झाल्याने वन्यजीवांना अन्नाच्या शोधात रस्त्यांवर यावं लागतं आहे. अशीच अंगावर काटा आणणारी घटना आंध्र प्रदेशातून समोर आली आहे. आंध्र प्रदेशातील तिरुपती येथे रस्त्याच्या बाजूने असलेल्या घनदाट झाडीतून एका बिबट्याने दबक्या पावलांनी रस्त्यावर येत दुचाकीस्वारांवर हल्ला केला. या हल्ल्याचे चित्रीकरण कॅमेऱ्यात कैद झाले आहे.

नेमकं काय घडलं ?

रस्त्याच्या कडेने दुचाकीस्वार कोणत्याही प्रकारचा अल्लडपणा न करता जात होते. अशातच रस्त्याच्या बाजूला असलेल्या घनदाट जंगलातून कोणत्याही प्रकारचा आवाज न करता अन्नाच्या शोधात भटकणारा एक बिबट्या शिकारीसाठी रस्त्यावर आला. रस्त्यावर येताच त्याने दुचाकीवर बसलेल्या दोन तरुणांवर झडप घातली.

मात्र बिबट्या या शिकारीत अयशस्वी ठरला आणि स्वतःच गाडीवर आदळला. तसेच घाबरलेल्या दुचाकीस्वारांनी तिथून पळ काढला. या घटनेचा थरार मागून येणाऱ्या एका बाईक स्वाराने त्याच्या मोबाईल मध्ये चित्रित केला. सध्या हा व्हिडिओ सोशल मीडियावर तुफान व्हायरल होत असून सदर व्हिडिओ आंध्र प्रदेशातील तिरुपती मधील आहे.

या प्रदेशात बिबट्या दिसणे सामान्य आहे, कारण बिबट्यांप्रमाणे अनेक प्राणी त्यांच्या अन्नाच्या शोधात जंगलाशेजारील रस्त्यांवर येतात. आणि शिकरीसाठी दिवसभर भटकत असतात. दरम्यान आता प्रशासनाने नागरिकांना रात्रीच्या सुमारास फिरताना सतर्क राहण्यास सांगितले आहे.

टीप : हा व्हिडीओ सोशल मीडियावर व्हायरल होत आहे. याची पडताळणी झालेली नाही. फक्त माहिती म्हणून आम्ही वाचक-प्रेक्षकांपर्यंत ही बाब पोहचवत आहोत. याचं आम्ही कोणत्याही प्रकारे समर्थन करत नाही.