Kerala Community Welcomes Shahid Afridi In Dubai? पहलगाम हल्ल्याचा बदला भारताने ऑपरेशन सिंदूरच्या मार्फत घेतला. भारतीय सैन्याने पाकिस्तानमधील ९ दहशतवादी अड्डे नष्ट केले. यामुळे बिथरलेल्या पाकिस्तानने भारतावर भ्याड हल्ला केला. पहलगाम हल्ल्यानंतर भारत आणि पाकिस्तान यांच्यातील संबंध ताणले गेले. या दरम्यान पाकिस्तान क्रिकेट संघाचा माजी कर्णधार शाहिद आफ्रिदीने अनेकदा भारताच्या विरुद्ध वक्तव्य केले. त्याने भारतीय सैन्यावर टीका देखील केली होती. यामुळे आफ्रिदी विरोधात भारतभर आक्रोश पाहायला मिळाला.

शाहिद आफ्रिदीचा सोशल मीडियावर एक व्हिडीओ व्हायरल होत आहे. या व्हिडीओमध्ये आफ्रिदी एका कार्यक्रमामध्ये सहभागी झाल्याचे पाहायला मिळते. दुबईमध्ये राहणाऱ्या केरळच्या लोकांनी आफ्रिदीचे जोरदार स्वागत केले. पाकिस्तान असोसिएशनद्वारे दुबईमध्ये आयोजित करण्यात आलेल्या कार्यक्रमादरम्यान हॉलमध्ये प्रवेश करताच मल्याळी समुदायाच्या काही सदस्यांनी बूम-बूम अशा घोषणा देत आफ्रिदीचे स्वागत केले.

शाहिद आफ्रिदीने त्याचे चाहते बूम-बूम आफ्रिदी असे म्हणतात. दुबईमधल्या कार्यक्रमामध्ये केरळ समितीच्या सदस्यांनी बूम-बूम म्हणत आफ्रिदीचे स्वागत केले. या कार्यक्रमादरम्यानचा व्हिडीओ सोशल मीडियावर व्हायरल झाला आहे. या व्हिडीओवरुन दुबईतील केरळ समिती आणि मल्याळी समुदायावर टीका केली जात आहे, त्यांना ट्रोल केले जात आहे.

शाहिद आफ्रिदीचा व्हिडीओ व्हायरल झाल्यानंतर भारतीयांनी संताप व्यक्त केला आहे. जो माणूस भारतीय सैन्यावर प्रश्नचिन्ह उपस्थित करत आहे, जो भारतावर, भारताच्या लष्करावर टीका करत आहे, अशा व्यक्तीचे स्वागत आपल्याच देशातील काही लोक करत आहेत. ही लज्जास्पद गोष्ट आहे, असे अनेकजण म्हणत आहेत. शाहिद आफ्रिदीचे स्वागत करणारे लोक हे क्यूबा समुदायाचे असल्याचे म्हटले जात आहे. हा दुबईतील केरळ समुदायाचा एक भाग आहे.