सांगली : सांगलीतून विशाल पाटील यांनी बंडखोरी करत अपक्ष उमेदवारी अर्ज भरला होता. वंचितची आज बैठक पार पडली असून त्या बैठकीत विशाल पाटील यांना पाठिंबा देण्याबाबत शिक्कामोर्तब झाला. ठाकरे गटाकडून सांगली लोकसभेसाठी चंद्रहार पाटलांचं नाव जाहीर झाल्यानंतर काँग्रेसमध्ये नाराजी होती. विश्वजीत कदम हे विशाल पाटील यांच्यासाठी आग्रही होते. परंतु विशाल पाटील यांनी बंडखोरी करत अपक्ष उमेदवारी अर्ज दाखल केला.काही दिवसांपूर्वी विशाल पाटील यांचे बंधू प्रतिक पाटील यांनी प्रकाश आंबेडकरांची भेट घेतली होती. आंबेडकरांसोबत विशाल पाटील यांना पाठिंबा देण्याची मागणी केली होती. त्यावेळी प्रकाश आंबेडकर यांनी परिस्थिती पाहून नंतर निर्णय घेऊ असं म्हणाले होते आणि आज अखेर वंचितने विशाल पाटील यांना पाठिंबा दिलाय.