अमेरिकेत काम करणाऱ्या लाखो परदेशी व्यावसायिकांना, विशेषतः भारतीय कामगारांना मोठा धक्का बसला आहे. अमेरिकेच्या गृह सुरक्षा विभागाने (DHS) परदेशी नागरिकांसाठी असलेली स्वयंचलित वर्क परमिट मुदतवाढ रद्द करण्याचा निर्णय घेतला आहे. या नवीन नियमानुसार, ज्यांचे वर्क परमिट नूतनीकरण अर्ज प्रलंबित आहेत, अशा परदेशी कामगारांना त्यांच्या वर्क परमिटची मुदत संपल्यानंतर ५४० दिवसांपर्यंत काम करत राहण्याची पूर्वीची सोय आता मिळणार नाही. ३० ऑक्टोबर २०२५ पासून हा नियम लागू होणार असून, त्यानंतर नूतनीकरणासाठी अर्ज करणाऱ्यांना मंजुरी मिळेपर्यंत काम थांबवावे लागू शकते. या निर्णयाचा मोठा फटका एच-१बी व्हिसाधारकांचे जोडीदार, एल आणि ई श्रेणीतील व्हिसाधारकांचे जोडीदार, एफ-वन व्हिसाधारक विद्यार्थी आणि आश्रय निर्वासितांना बसणार आहे.