तुळजापूर येथील श्री तुळजाभवानी मंदिरातील शक्ती संचरित अष्ट आयुधांपैकी एक असलेली तलवार गहाळ झाल्याच्या आरोपामुळे गेल्या काही दिवसांपासून खळबळ माजली होती. या प्रकरणावर अखेर मंदिर संस्थानाने प्रेस नोट जाहीर केली आहे. तलवार गहाळ नसून ती सुरक्षित असून दररोजच्या पूजेसाठी वाकोजीबुवा यांच्या मठात ठेवली असल्याचे मंदिर संस्थानाने स्पष्ट केले आहे.

तुळजाभवानी देवीच्या गर्भगृहात असणाऱ्या अष्ट आयुधांपैकी ही तलवार अत्यंत पवित्र मानली जाते. काही माध्यमांतून ही तलवार गायब झाल्याचा दावा करण्यात आला होता. त्यानंतर पुजारी मंडळानेही मंदिर संस्थानावर गंभीर आरोप केले होते. मात्र, मंदिर संस्थानाने प्रसिद्ध केलेल्या अधिकृत प्रसिद्धीपत्रकानुसार, ही तलवार मंदिरात ठेवलेली नसली तरी ती सुरक्षित असून वाकोजीबुवा मठात नियमित पूजेसाठी ठेवण्यात येते. मंदिर संस्थानाने स्पष्ट केलं आहे की, माध्यमांमधून पसरवण्यात आलेल्या बातम्या निराधार असून तलवारीसंदर्भात कोणतीही गहाळीची बाब नाही. संस्थानाच्या म्हणण्यानुसार, पूजेसाठी ही तलवार महंतांच्या मठात ठेवण्याची परंपरा आहे, आणि ती अजूनही त्या ठिकाणीच सुरक्षित आहे.