तुळजापूर : महाराष्ट्राची कुलस्वामिनी आई तुळजाभवानी देवीच्या भक्तांसाठी एक आनंदाची बातमी समोर आली आहे. येत्या २५ जुलैपासून तुळजाभवानी मातेच्या दर्शनाला येणाऱ्या भाविकांना प्रसिद्ध ‘चितळे बंधूंच्या लाडूंचा प्रसाद’ दिला जाणार आहे.

या उपक्रमाचा शुभारंभ जिल्हाधिकारी कीर्ती किरण पुजार यांच्या हस्ते होणार असून, प्रसाद वाटपाचा कार्यक्रम २५ जुलै रोजी पार पडणार आहे. या संदर्भातील महत्त्वपूर्ण बैठक आज तुळजाभवानी मंदिर संस्थानच्या सभागृहात पार पडली. यामध्ये लाडू प्रसाद वाटपासंबंधीचा निर्णय घेण्यात आला आहे. लाखो भक्तांच्या श्रद्धेचा विचार करून मंदिर प्रशासनाने हा उपक्रम हाती घेतला असून, त्यामुळे भाविकांना भक्तीच्या सोबतच स्वादिष्ट प्रसादाचाही लाभ मिळणार आहे. महाराष्ट्रातील साडे तीन शक्तिपीठापैकी एक असलेल्या तुळजाभवानी मंदिरात दररोज हजारो भाविक दर्शनासाठी येत असतात. त्यामुळे चितळे बंधूंचा लाडू प्रसाद ही एक विशेष आकर्षण ठरणार आहे.