त्र्यंबकेश्वर येथील ज्योतिर्लिंग मंदिरात कालसर्प पूजेच्या नावाखाली भाविकांची दिशाभूल केली जात असल्याचे प्रकार समोर आले आहेत. देशातील बारा ज्योतिर्लिंगांपैकी एक असलेल्या या प्रसिद्ध मंदिरात काही व्यक्ती भाविकांना फसवून ‘भावनिक लूट’ करत असल्याची तक्रार देवस्थान ट्रस्टकडे आली आहे. त्यानंतर देवस्थान ट्रस्टने मोबाईल अॅप्लिकेशनच्या माध्यमातून पोलिसांकडे औपचारिक तक्रार दाखल केली आहे. या प्रकरणी मंदिर विश्वस्तांनी भाविकांनी अशा खोट्या आश्वासनांना बळी न पडण्याचे आवाहन केले आहे. तसेच, मंदिरात केवळ नियमानुसार आणि अधिकृतरीत्या मान्य असलेल्या पूजाच करण्यात येतात, यावरही भर देण्यात आला आहे. भाविकांची फसवणूक थांबवण्यासाठी प्रशासनाकडून लवकरच ठोस पावले उचलली जाणार आहेत.